Түөлбэ үлэтинэн инники күөҥҥэ

Быйыл Горнай улууһугар Бэрдьигэстээххэ «Эйэ» түөлбэ тэриллибитэ түөрт сылын туолла.

Бу 4 сыл тухары биһиги түөлбэбит элбэх тэрээһиҥҥэ көхтөөх кыттыыны ылар. Сылын аайы ыытыллар түөлбэлэр икки ардыларынааҕы кэлим күрэхтэһиигэ инники күөҥҥэ сырыттыбыт. 2021 сылга олохтоохтор бэйэбит күүспүтүнэн оҥостубут дьоҕус искибиэрбит сылын аайы сайын сибэккинэн киэркэйэн, кыһын Саҥа дьыллааҕы уотунан сандааран олохтоохтор сүргэлэрин көтөҕөр.

Быйыл атырдьах ыйыгар Аммаҕа ыытыллыбыт өрөспүүбүлүкэтээҕи 3 ТОС-тар пуорумнарыгар дьоҕус искибиэрбит туһунан кэпсиир хаартысканан быыстапкабыт биһирэбили ылан «Олоххо киирбит бырайыактар» быыстапка-күрэхтэһиигэ Кыайыылаах дипломунан уонна 15 тыһ. суумалаах сэртипикээтинэн наҕараадаламмыппыт.

Матта, Бэрдьигэстээх уулуссалар быысаһыылара сылын аайы саас-күһүн уунан туолан айаҥҥа кыһалҕаны үөскэтэр дьааманы олохтоохтор харчынан кыттыһаннар шлак, кумах куттаран, суолларын тупсардылар. Сыл аайы күрэхтэһиигэ миэстэлэспит харчыбытын мунньунан быйыл баҕа санаа оҥостубут балаҕаммыт көҥдөйүн туттардыбыт. Салгыы балаҕаммыт ис бараана, көмүлүөк оҥоһуллара былааннанар. Балаҕаммыт тутуллан үлэлээн бардаҕына, түөлбэбит сайдыыта өссө күүһүрүө, араас тэрээһиннэри ыытан олохпут-дьаһахпыт өссө сэргэхсийиэ диэн эрэнэбит. Инникитин грантовай хайысхаҕа үлэлэһэн, бырайыак суруйуутунан дьарыктанан эбии үбүлэнэр суоллары тобулар сыал-сорук турар. Түөлбэ сайдыыта, үлэтэ, ситиһиитэ олохтоохтор бэйэбититтэн тутулуктааҕын бары өйдүүбүт. Төһөнөн көхтөөхпүт, сомоҕолоһуулаахпыт да, бэйэбит кыахпытынан кыаллар кыһалҕалары быһаарыахпытын, олохпут хаачыстыбатын тупсарыахпытын сөп.

«Эйэ» түөлбэбит олохтоохторун кэлэн иһэр Саҥа 2026 сылынан эҕэрдэлиибит уонна инникитин биир сомоҕо буолан үүнүүгэ-сайдыыга дьулуһуоххайыҥ диэн ыҥырабыт.

Жанна Егорова,

түөлбэ салайааччыта.

Бэрдьигэстээх, Горнай.

Хаартыскалар ааптар тиксэриилэрэ