Түөрт байыас эргиллэн кэллэ

Саха Өрөспүүбүлүкэтин нэһилиэнньэтин олоҕор-дьаһаҕар куттал суох буолуутун хааччыйар судаарыстыбаннай кэмитиэт бэрэссэдээтэлэ Дмитрий Николаевич Лепчиков байыаннай эпэрээссийэттэн эргиллэн кэлбит буойуттары Дьокуускай аэропуордугар көрсүбүттэрин туһунан иһитиннэрдэ.

— Кулун тутар 8 күнүгэр Дьокуускай аэропуордугар байыаннай эпэрээссийэттэн кэлбит түөрт байыаһы, олор ортолоругар СӨ Быыһыыр сулууспатын Үөһээ Бүлүүтээҕи көрдүүр-быыһыыр этэрээтин начаалынньыгын Михаил Аны көрүстүбүт. Икки байыас ыарахан бааһырыы кэнниттэн доруобуйаларын чөлүгэр түһэринэ, эмтэнэ, атыттар уоппускаҕа уонна саастарынан уурайан кэллилэр. Терминалтан тахсыыларыгар байыастарга Ил Дархан уонна Бырабыыталыстыба эҕэрдэтин тиэртим уонна Ил Дархан А.С.Николаев аатыттан саха быһаҕын хас биирдиилэригэр бэлэх туттардым.
Оттон Михаил Аны биһиги, СӨ нэһилиэнньэтин олоҕор-дьаһаҕар куттал суох буолуутун хааччыйар судаарыстыбаннай кэмитиэт, СӨ Быыһыыр сулууспатын, Үөһээ Бүлүү улууһун дьаһалтатын бэрэстэбиитэллэрэ, бииргэ үлэлээбит табаарыстара, чугас доҕотторо уонна дьиэ кэргэнэ буолан, көрүстүбүт.
Михаил ааспыт сыл балаҕан ыйыгар биир бастакынан баҕа өттүнэн байыаннай эпэрээссийэҕэ барбыта. Онно тиийэн кини взвод хамандыырын солбуйааччытын быһыытынан бойобуой сорудахтары хорсуннук толорон эргилиннэ. Бу бара турар байыаннай эпэрээссийэҕэ кини улахан уола эмиэ сулууспалыырын, кинилэр байыаннай дьайыылар буола турар сирдэригэр көрсүбүттэрин бэлиэтиир тоҕоостоох. Михаил сынньанан, доруобуйатын көрүнэн баран, урут үлэлии сылдьыбыт үлэтигэр тахсыаҕа.
Байыаннай сулууспалаахтар өрөспүүбүлүкэ салалтатыгар, Саха сирин бары олохтоохторугар улахан көмөлөрүн, өйөбүллэрин иһин улахан махталларын биллэрдилэр.