Түөрт киһи тыыныгар турбут 60 саастаах киһи сууттанна

Мииринэй куорат 60 саастаах олохтооҕо түөрт киһини өлөрөн сууттанна. Бу туһунан СӨ Борокуратуурата иһитиннэрэр.

2023 сыл алтынньы 15 күнэ үүнэр түүнүгэр сууттанааччы итирик туруктаах сылдьан ыаллыы олорор киһитин аанын тоҥсуйан киирэн, ТОЗ-87 саанан искэ ытан өлөрбүт.

Салгыы быһылаан буолбутун билбит дьиэҕэ баар өссө биир эр киһини уонна икки дьахтары хостон хоско сылдьан ытыалаабыт.

Саха сирин Үрдүкү суута бу киһини буруйун боруостуур холуонньаҕа тыыннааҕын тухары көҥүлүн быһарга бириигэбэрдээтэ.

Бириигэбэр сокуоннай күүһүгэр киирэ илик.