Түөрт киһини өлөрүүгэ уорбаланааччыны туттулар

Бэҕэһээ Мииринэй оройуонугар дьулаан быһылаан тахсыбытын  туһунан иһитиннэрии кэлэн, үгүс киһини аймаата. Ол курдук, Мииринэйгэ чааһынай дьиэҕэ саанан ытыллыбыт икки эр киһи уонна икки дьахтар өлүгэ көстүбүтэ. 

Өлбүттэр — 1978 уонна 1981 сыллаах төрүөх эр дьон итиэннэ 1986 уонна 1987 сыллаах дьахталлар. Быһылаан тахсыбыт сиригэр 12-с калибрдаах саа ботуруонун булбуттара.

РФ Ис дьыалаҕа министиэристибэтин официальнай бэрэстэбиитэлэ  Ирина Волк иһитиннэрбитинэн, Мииринэй куоракка түөрт киһини өлөрүүгэ уорбаланааччыны туппуттар. Ол курдук 50 саастаах Мииринэй олохтооҕо тутуллубут. Олорор аадырыһынан 12-с калибрдаах саа регистрациялааҕа биллибит. Маны таһынан полицейскайдар быһылаан тахсыбыт сиригэр биир сибидиэтэл баарын быһаарбыттар.

Билигин икки гражданины РФ Силиэстийэлиир кэмитиэтин территориальнай салаатыгар аҕаллылар диэн Ирина Волк телеграмҥа  иһитиннэрдэ.