Түөрт куоска оҕотун болкуонтан бырахпыт дьахтары буллулар

Дьокуускайга алтыс этээстэн түөрт куоска оҕотун бырахпыт дьахтар туһунан социальнай ситимҥэ киэҥник тарҕаммыта. Полиция үлэһиттэрэ уорбаланааччы дьахтары булбуттарын туһунан  ИДЬМ пресс-сулууспата иһитиннэрэр.

Ол курдук, түөрт куоска оҕотун алтыс этээс болкуонуттан бырахпыт 30 саастаах уорбаланааччыга Арассыыйа Федерациятын холуобунай кодексатын 245 ыст. «Кыылга кырыктаах сыһыан иһин» холуобунай дьыала тэриллиэн сөп.

Бэлиэтээн суруйдахха, алтыс этээс болкуонуттан быраҕыллыбыт түөрт куоска оҕолоруттан үһүн амарах санаалаах дьон быыһаан бэтэринээринэй килииникэҕэ илдьибиттэр. Хомойуох иһин, төрдүс куоска оҕото өлбүт.