Түөрт кыһыл оҕоҕо сэдэх генетическэй ыарыылары буллулар

Саха сиригэр 2025 сыл 8 ыйын устата кэҥэтиллибит неонатальнай чинчийии көмөтүнэн, түөрт кыһыл оҕоҕо сэдэх генетическэй ыарыылары буллулар диэн СИА суруйар. 

Икки саҥа төрөөбүт оҕоҕо быраастар «бастакы иммунодефицит» ыарыыны, өссө икки оҕоҕо — бэссэстибэлэр атастаһыылара кэһиллиитин буллулар. Бу кэнники ыарыы хаанынан бэриллэр, үксүгэр биллибэккэ сылдьан, оҕо кыратыгар өлөр.

— «Бастакы иммунодефициттээх» оҕолору быраастар иммунизацията суох кэтээн  көрүөхтэрэ. Оттон хаанынан бэриллэр ыарыылаах оҕолор тас көрүҥнэринэн туох да уратыта суохтар, биллэрбэттэр. Ол эрээри иммуннай уонна киин ньиэрбинэй систиэмэлэрэ кэһиллиилээхтэр. Ыарыыны эрдэ буллахха, оҕо аһылыгын уларытан, исписэлиистэргэ эрдэттэн көрдөрөн, сөпкө улаатарын ситиһиэххэ сөп. Бу аутосомнай-рецессивнэй ыарыыларга сыһыаннаах, ол эбэтэр, төрөппүттэрэ бэйэлэрэ маннык алдьаммыт гени илдьэ сылдьаллар,— диэн РБ № 1 — Национальнай мэдиссиинэ киинин Перинатальнай киинин неонатологическай көмөҕө дириэктэри солбуйааччы Саргылаана Алексеева кэпсээтэ.

— Быйыл «Дьиэ кэргэн» национальнай бырайыак оҕо доруобуйатын харыстыыр бырагырааматын чэрчитинэн, биһиги неонатальнай сулууспабыт эрдэ төрөөбүт оҕолору көрөр-харайар тэриллэринэн олус үчүгэйдик хааччылынна. Ол иһигэр кувезтары, инкубатордары, ИВЛ аппарааттарын аҕаллылар, — диэн РБ № 1 — Национальнай мэдиссиинэ киин генеральнай дириэктэрэ Станислав Жирков кэпсээтэ.