Тыһыынчаттан тахса бэйдиэ сылдьар ыты туттулар

Саха сиригэр кулун тутар ыйга бэйдиэ сылдьар 1061 ыты туттулар. Бу мантан аҥаардара — 512 ыт Дьокуускайга тутулунна. Бу туһунан бэтэринээрийэ управлениета иһитиннэрэр.

Нерюнгри оройуонугар ыттары көрөр-харайар пууҥҥа 166 ыты, Хаҥаласка — 72 ыты, Ньурбаҕа — 68, Намҥа — 45 ыты тутан аҕалан, туттарбыттар. Оттон дьон бэйэтэ 41 ыты тутан ылан, туттарбыттар.

Дьиэ кыылларын көрүү-харайыы быраабылатын кэспит хаһаайыттарга сыл саҥатыттан 76 боротокуол толоруллубут.

Ыттарын көрбөккө-истибэккэ, бэйдиэ ыытан кэбиһэр хаһаайыттар административнай эппиэтинэһи сүгэллэр, ыстараап суумата — бастакы кэһиигэ 1000-3000 солкуобай, иккис кэһиигэ — 3000-5000 солкуобай.

Ыт киһиэхэ саба түспүт, ытырбыт, эбэтэр, таҥаһын, малын-салын алдьаппыт буоллаҕына, ыстараап 30 тыһыынча солкуобайга тиийиэн сөп.