Тыһыынчаттан тахса эдэр ыал көмө төлөбүрү ылла

Саха сиригэр саҥа холбоспут, 25 саастарын туола илик 1268 паара 50 тыһыынча солкуобай сумалаах биирдэ бэриллэр төлөбүрү ылла.  Ил Дархан Айсен Николаев көҕүлээбит бу көмөтө 2024 сыл атырдьах ыйыттан бэриллэр.

Сүрүн ирдэбилинэн, кэргэнниилэр 25 саастарын туола илик уонна аан бастаан саахсаламмыт, Саха сиригэр бастайааннай олорор  буолуохтаахтар.

Төлөбүргэ сайабылыанньаны кэргэнниилэртэн биирдэстэрэ олорор сиригэр баар социальнай көмүскэл  управлениетыгар, эбэтэр, судаарыстыбаннай уонна муниципальнай өҥөлөр порталларын туһанан, электроннай көрүҥүнэн биэрэр. Төлөбүрү ыларга дьиэ кэргэн саахсаламмыт күнүттэн алта ый иһигэр сайабылыанньа биэриэххэ сөп.

Төлөбүр 10 үлэ күнүн иһигэр оҥоһуллар.

Судаарыстыбаннай өйөбүл миэрэтэ дьиэ кэргэн институтун бөҕөргөтөргө уонна дьиэ кэргэн регистрациятын чэпчэтэргэ туһуланар диэн үлэ, социальнай сайдыы министиэристибэтэ иһитиннэрэр.

Сиһилии: https://mintrud.sakha.gov.ru/news/7106