Тыһыынчаттан тахса киһи «Каадырдар» бырайыак иитинэн үөрэнэр

Саха сиригэр бу бырайыак иитинэн өрөспүүбүлүкэ 1049 олохтооҕо үөрэнэр.

—Өрөспүүбүлүкэ олохтоохторун үөрэтии 82 бырагырааманан тэрилиннэ. Бу федеральнай оператордар талбыт, үлэ ырыынагар ирдэниллэр идэлэр Бүтүн Арассыыйатааҕы испииһэктэригэр сөп түбэһиннэриллибит. Ол курдук: стропальщик, электрическэй тэриллэри өрөмүөннүүр, оҥорор электромонтер, сварщик, машинист, медсиэстэрэ, уо.д.а. идэлэр манна бааллар, — диэн СӨ нэһилиэнньэ дьарыктаах буолуутун Судаарыстыбаннай кэмитиэтигэр бэлиэтээн эттилэр.

Үлэ биэрээччилэр ирдэбиллэрэ үөрэххэ учуоттанарын бэлиэтиир наадалаах. Үөрэх саҕаланыан иннинэ гражданнар үлэҕэ киирии туһунан дуогабардары түһэрсэллэр. Үөрэҕи бүтэрбиттэр «Сахатранснефтегаз», «УК Колмар», «Якутуголь», «Саханефтегазсбыт», «Якутскэнерго» ПАО, «Водоканал», «Полиметалл УК», «Саха Сирин тимир суоллара», «СӨ ОДьКХ» ГУП, «Якутдорстрой», ону тэҥэ мэдиссиинэ тэрилтэлэригэр, уо.д.а. үлэлииллэр.

Босхо үөрэнии бырааба гражданнар сорох категорияларыгар көрүллэр, ол курдук, 50 уонна онтон аҕа саастаах дьоҥҥо, биэнсийэҕэ тахсаллара чугаһаабыт саастаахтарга, оҕолорун үһүгэр диэри көрөн олорооччуларга. Маны таһынан инбэлииттэр, үлэ көрдүүр сыалтан дьарыктаах буолуу сулууспатын органнарыгар сылдьыбыт гражданнар, үлэтэ суохтар, байыаннай дьайыы бэтэрээннэрэ уонна кинилэр дьиэ кэргэттэрин чилиэннэрэ, 35-гэр диэри саастаах ыччат, уо.д.а.

Сиһилии: https://www.sakha.gov.ru/news/14230

СӨ Ил Дарханын уонна Бырабыыталыстыбатын пресс-сулууспата