Тыһыынчаттан тахса киһи ойуур баһаарын умуруорар

Бүгүн, от ыйын 11 күнүгэр, уоту утары охсуһууга 1047 киһи уонна 37 тиэхиньикэ үлэлииллэр. Бу туһунан брифиҥҥэ СӨ Экологияҕа миниистирин солбуйааччы Андрей Коноплев иһитиннэрдэ.

Ааспыт сууккаҕа өрөспүүбүлүкэ сиригэр-уотугар 14 514 га иэннээх 26 ойуур баһаарын Амма, Алдан, Үөһээ Халыма, Муома, Өймөкөөн, Орто Халыма, Уус Маайа улуустарыгар умуруордулар.

Авиациянан уонна космостан кэтээн көрүүнэн 83,3 га иэннээх сиринэн 10 ойуур баһаары булбуттар. Ойуур баһаарын төрүөтэ – этиҥнээх ардах.

От ыйын 11 күнүн сарсыардатыгар барыта 149 ойуур баһаара (уот хаппыт уопсай иэнэ 323 034,1 га) баара бэлиэтэнэр. Итинтэн 7 бохсулунна (1640 га) — Амма, Үөһээ Халыма, Алдан, Уус Маайа, Нерюнгри, Мииринэй оройуоннарыгар.

Маны сэргэ, 1 ландшафтнай баһаар (иэнэ 537 га) Өймөкөөн оройуонугар баар.