Саха тыйаатырыгар — Нуучча тыйаатырын оскуолатын күннэрэ

Бэс ыйын 22-30 күннэригэр Былатыан Ойуунускай аатынан Саха академическай тыйаатырыгар Нуучча тыйаатырын оскуолатын күннэрэ ыытыллыахтара. «Учуутал эн үрдүк ааккар сүгүрүйэн…» күннэр Арассыыйаҕа Учуутал уонна уһуйааччы сылыгар, итиэннэ Малай тыйаатыр иһинэн М.С.Щепкин аатынан Тыйаатыр үрдүкү училищетын саха алтыс устуудьуйатын бүтэрээччилэр кэлэллэригэр ананаллар.

Ол курдук:

Бэс ыйын 22 күнүгэр 11 чаастан Олоҥхо саалатыгар М.Щепкин аатынан Тыйаатыр үрдүкү училищетын преподавателлара кыттыылаах пресс-кэмпэриэнсийэ буолуоҕа. Пресс-кэмпириэнсийэҕэ РФ норуодунай артыыһа, А.Е.Кулаковскай уонна П.А.Ойуунускай аатынан судаарыстыбаннай бириэмийэлэр лауреаттара Андрей Борисов, СӨ норуодунай артыыһа, РФ үтүөлээх артыыһа, П.А.Ойуунускай аатынан судаарыстыбаннай бириэмийэ лауреата Анатолий Николаев уонна М.Щепкин аатынан училище преподавателлара: РФ норуодунай артыыската, Арассыыйа судаарыстыбаннай Малай тыйаатырын сүрүннүүр артыыската Людмила Титова;

Башкортостан Өрөспүүбүлүкэтин ускуустубатын үтүөлээх диэйэтэлэ Наталия Макарова;

Арассыыйа норуодунай артыыската, А.С.Пушкин аатынан Москватааҕы драматическай тыйаатыр сүрүннүүр артыыската Тамаря Лякина;

Моссовет аатынан Москватааҕы тыйаатыр артыыската Анна Гарнова;

Арассыыйа академическай Малай тыйаатырын артыыһа Максим Филатов;

В.Маяковскай аатынан Москватааҕы академическай тыйаатыр артыыската Дарья Аносова кыттыахтара.

Бэс ыйын 23-28 күннэригэр Тыйаатыр үрдүкү оскуолатын саха алтыс устуудьуйатын бүтэрээччилэр дипломнай испэктээктэрин көрөөччүлэргэ бэлэхтиэхтэрэ.

Бэс ыйын 29 күнүгэр режиссер Сергей Потапов туруорар М.Горькай «Тимир Баасса» (»Васса Железнова») испэктээгэр артыыстар икки састааптара кыттыаҕа. Бу дьикти бырайыакка Москва тыйаатырдарын сүрүннүүр артыыстара: РФ норуодунай артыыската Людмила Титова (Малай тыйаатыр), Анна Гарнова (Моссовет аатынан тыйаатыр), Дарья Аносова (В.В. Маяковскай аатынан МАТ), Максим Филатов (Малай тыйаатыр) оонньуохтара. Испэктээк икки тылынан оонньонуоҕа.

Ону сэргэ, эдэркээн артыыстар дипломнай үлэлэрэ:

Бэс ыйын 23 күнүгэр «Сайыҥҥы түүҥҥэ түүл» (У.Шекспир) — Улахан саалаҕа;
Бэс ыйын 25 күнүгэр «Сакалаат саллаат» (Бернард Шоу) -– Алампа аатынан кыра саалаҕа;
Бэс ыйын 26 күнүгэр «Гроза» (А.Островскай) -– Улахан саалаҕа;
Бэс ыйын 27 күнүгэр «Дон Жуан или каменный пир» (Мольер) — Улахан саалаҕа;
Бэс ыйын 28 күнүгэр «Улахан уол» (А.Вампилов) -– Алампа аатынан Кыра саалаҕа;
Бэс ыйын 30 күнүгэр М.Щепкин аатынан Тыйаатыр үрдүкү училищетын 6-с устуудьуйатын бүтэрбит ыччаттарга үөрэҕи бүтэрбиттэрин туоһулуур дипломнарын бар дьоннорун  ортотугар туттарар долгутуулаах дьоро  түгэн үүнүөҕэ.

«Учуутал эн үрүк ааккар сүгүрүйэн» Күннэр артыыс идэтин бүтэрэн кэлбит ыччаттарбыт кэнсиэртэринэн үөрүүлээхтик түмүктэниэхтэрэ.