Салгыы
Тыйыс кыһыммыт, бытарҕан тымныыбыт хоһууннара

Тыйыс кыһыммыт, бытарҕан тымныыбыт хоһууннара

22.03.2023, 17:25
Хаартыска: ааптар тиксэриитэ
Бөлөххө киир:

Кулун тутар 21 күнүгэр ДьУоКХ тэриллибитэ 20 сыллаах өрөгөйдөөх үбүлүөйүн Уус Алдан улууһун үлэһиттэрэ улуус киинигэр мустан, киэҥ далааһыннаахтык, үлэни-сынньалаҥы тэҥник дьүөрэлээн бэлиэтээтилэр.

Күннээҕи тэрээһин бырагыраамата киэҥ буолан, сарсыардаттан күрэхтэһии саҕаланан, Мындааба нэһилиэгэр сааскы дьыбарга микрофон саҥата, эр дьон күрэхтэһээччилэри күөттүүр хаһыылара өрө ньиргийэн олордо.

Халлааммыт сааскытын мэлдьэһэн, арҕааттан хаҕыс тыалланан, тымныыга хайдах быһаарынар эбиккит диэбиттии,  тургутан көрдө. Айылҕа араас кубулҕатыгар үлэлээн буспут-хаппыт уолаттарга тымныы харгыс буолбата.  Киирии тылы эппит ДьУоКХ хаһаайыстыбатын салайааччыта Евгений Иванович Цой барыларын бүгүҥҥү күнүнэн эҕэрдэлээн туран, күрэхтэһээччилэргэ кыайыыны баҕаран, күрэхтэһии  үөрүүлээх-быһыыга майгыга аста. 30 мүнүүтэҕэ сыбааркаһыттар 100-х турбаны быһаннар,  атах оҥорон иһэрдиигэ илин-кэлин түһүстүлэр.

Уопсай түмүккэ: 1 миэстэни  Мүрүтээҕи бастакы учаастак үлэһиттэрэ ыланнар (салайааччы Лиханди Юрий Геннадьевич) үөрүүлэрэ үксээтэ.

2 миэстэни эмиэ Мүрү иккис учаастага ылан (салайааччы Крылов Павел Гаврильевич) үөрэн сэгэлдьистилэр.

3 миэстэ Суотту салаатын  уолаттарыгар тиксэн (салайааччы Черкашин Николай Николаевич) уруйданнылар.

Миэстэҕэ тиксибэтэхтэр «Чэ, бээ, эһиил” дэһэннэр санааларын бөҕөргөттүлэр. Уолаттар үлэлэрин хабааныгар сөп түбэһиннэрэн, күрдьэҕинэн чоҕу ыраах быраҕыыга күрэхтэһэн, туһугар эмиэ ыһыылаах-хаһыылаах ураты күрэс буолан, дьон болҕомтотун тарта.

Күнүс 12 чааска Үрүҥ дьиэҕэ улууспут баһылыга Алексей Федотов кыттыылаах “төгүрүк остуол” тэриллэн аһаҕас кэпсэтии, инникини барыллааһын, кэскиллээҕи түстээһин буолла.

Күнүскү аһылыкка “555” кафеҕа дьоһун остуол тэриллэн, тото-хана аһаан, ирэ-хоро кэпсэтэн, аны 3 чааска Тойон Мүрү дыбарыаһыгар эҕэрдэ кэнсиэрдээх кылаан тэрээһин буолла. Улуус баһылыга Алексей Васильевич Федотов, ДьУоКХ дириэктэрэ Евгений Иванович Цой үлэһиттэри истиҥник эҕэрдэлээннэр, бастыҥ үлэһиттэргэ наҕараада туттараннар дьон санаат көтөҕөн, үлэҕэ кынаттаатылар.

ДьУоКХ үлэһиттэрин күүһүнэн турбут кэнсиэр сааскы салгынынан сайа охсон санаабытын көтөхтө. Бээрийэ ыччаттара вокальнай-инструментальнай ансаамбылга  оонньоон, тыыннаах дорҕооҥҥо доҕуһуоллатан,  биэс ырыаны бэлэх ууммуттара силиги ситэрдэ. Уолаттар аҥардас үлэнэн эрэ муҥурдаммакка, кэрэ эйгэлиин эҥэрдэһэллэрэ биһирэниэн биһирэнэр. Бары үчүгэй тэрээһинтэн астынан-дуоһуйан тарҕастыбыт.

«Аҕыс ыйдаах тымныыбытын

Оһох оттуллан сылытар,

Үрүҥ туманы бурҕатан

Үөһээ буруота унаарар.

Олохпут сылааһын эйгэтин

Уолаттар бигэтик хааччыйаллар,

Оһохторун кичэллик оттоннор

Уйгулаах олоҕу түстүүллэр.

Истиҥник махталы этиэххэ

Ис сүрэх иэйиитин тиһэммит,

Уоскулан олоҕу баҕарыахха

Уйгулаах түөрэҕи баҕараммыт».

Тус санаабын эттэхпинэ, бэҕэһээ ДьУоКХ тэрээһинигэр тилэри сылдьан көрдөххө, олох-дьаһах уларыйарыныы,  салайааччылар бары эдэр эрчимнээх, үлэни өрө туппут, идэлэрин толору баһылаабыт исписэлиистэр эбит. Аҥаардас тэрээһин киэҥ далааһыннаахтык барбытыттан да көрдөххө, үлэһиттэригэр кыһамньылаахтара биллэр. Оннук да буолуохтаах,  биһиги курдук тыйыс тымныылаах кыһыммытыгар бу салаа үрдүктүк тутуллуохтаах. Хас биирдии үлэһит сүҥкэн эппиэтинэһи сүгэрин олохпут эрэйэр. ДьУоКХ бары үлэһиттэригэр этэҥҥэ буолууну баҕарабын! Доруобай, дьоллоох буолуҥ!

Иннокентий ПОПОВ-ОҔУРУОТТААХ

+1
0
+1
0
+1
0
+1
0
+1
0
+1
0
+1
0
Бары сонуннар
Салгыы
25 июля
  • 21°C
  • Ощущается: 21°Влажность: 78% Скорость ветра: 2 м/с

Сообщить об опечатке

Текст, который будет отправлен нашим редакторам: