Тыйыс тымныы тыынын билиммэккэ бэлисипиэтинэн Дьааҥы куоратыгар…

Арассыыйа эрэгийиэннэринэн аккордеоннаах бэлисипиэтинэн айанньыт Клим Калужских Дьааҥы куоратыгар тиийбит. Бу туһунан ТАСС-ка айанньыт иһитиннэрдэ.

Айанньыт Дьааҥы улууһун Баатаҕай сэлиэнньэтигэр тохсунньу 24 күнүгэр түүн тиийбит. Кинини онно 50 кыраадыстаах тыйыс  тымныы тыына көрсүбүт. Өрөспүүбүлүкэ иһинэн кини массыына аайы олорсон (автостопунан) уонна бэлисипиэтинэн сылдьар.

«Мин Баатаҕайтан бэлисипиэтинэн тахсыбытым. Суолга кэлин манна ортотунан 50 кыраадыс томороон тымныыга кэнники көлүөһэм тэстибитэ. Онон кутаа уоту оттоору  мас хомуйан эрдэхпинэ, хата тутатына, Владимир диэн дальнобойщик тиийэн кэлбитэ. Бэлисипиэппин кэннигэр тиэйэн, ити курдук дальнобойщигы кытта айаннаан, Дьааҥы куоратыгар саҥа бу кэллим», — диэн Калужских кэпсээбит.

Тохсунньу ортотугар кини айанын кэмигэр Саха сиригэр кэлбитин, өрөспүүбүлүкэ киин куоратыгар сылдьыбытын уонна салгыы хоту диэки айаннаабытын иһитиннэрдэ.

«Өскөтүн ким эмит Дьааҥы эбэтэр Тиксии диэки барар буоллаҕына, мин эмиэ онно барыам этэ. Уопсайынан, билигин төннүөххэ дии саныыбын — аан бастаан Өймөкөөҥҥө, онтон Магадааҥҥа. Онтон, баҕар, Чукоткаҕа тиийэр инибин. Айаным былаана уларыйар», — диэн айанньыт инники былааннарын туһунан ыйытыыга хоруйдаата.