Тыл сайдыытын сүбэ мунньаҕа буолла

СӨ Ил Дарханын иһинэн үлэлиир Тыл сайдыытын сүбэ мунньаҕа тылы сайыннарыы судаарыстыбаннай бырагырааматын быйыл олоххо киирэр тэрээһиннэрин көрдө.

Былырыыҥҥыттан Ил Дархан сорудаҕынан, судаарыстыбаннай уонна официальнай тыллары сайыннарыыга, чөл хаалларыыга туһуламмыт судаарыстыбаннай бырагыраама үбүлээһинэ 100 мөл. солк. диэри эбиллибитэ. Бырабыыталыста бэрэссэдээтэлин солбуйааччы Сергей Местников, Ил Дархан быһаарыныыларын олоххо киллэрии соруга турарын ыйда. Ол курдук, бастатан туран, өрөспүүбүлүкэ сокуоннара  нууччалыы, сахалыы икки тылынан таҥыллан баттанар буолуохтара. Иккиһинэн, быйыл тиэрмин хамыыһыйата үлэлээбитэ иккис сылыгар барбытын, салгыы үлэлиэҕин иһитиннэрдэ.

СӨ Ил Дарханын уонна Бырабыыталыстыбатын дьаһалтатыгар тыл сайдыытын боппуруостарын сүрүннүүр управление салайааччыта, СӨ Ил Дарханын иһинэн тыл сайдыытын Сэбиэтин эппиэттиир сэкирэтээрэ Римма Жиркова Ил Дархан иһинэн үлэлиир СӨ тыллары сайыннарар Сэбиэт быйылгы сыллааҕы үлэтин былаанын бырайыагын билиһиннэрдэ. Ол курдук, быйыл Сэбиэт састаабыгар кэккэ эбиилэр, уларыйыылар киирбиттэр, үлэ былаанын бырайыага үс салааттан турар. Киирбит этиилэри учуоттаан, ырытыһан баран үлэ былаанын бигэргэттилэр.

Салгыы Ил Дархан иһинэн үлэлиир Стратегическай чинчийии киинин салайааччыта Игорь Николаев былырыын өрөспүүбүлүкэҕэ тыл туругун туһунан ыыппыт чинчийиилэрин түмүгүн билиһиннэрдэ. Чинчийииттэн көстөрүнэн, ыйытыкка кыттыбыт үгүс дьон, төрөөбүт тылын билэр оҕо ыччат ахсаана эбиллэригэр баҕарарын биллэрбит.

Үсүһүнэн “Саха Өрөспүүбүлүкэтигэр судаарыстыбаннай уонна дьиҥ таһымнаах тыллары чөл хаалларыы, сайыннарыы” өрөспүүбүлүкэ судаарыстыбаннай бырагыраамата олоххо киириитин быйылгы хаамыытын туһунан иһитиннэриини Култуура уонна духуобунай сайдыы миниистирин бастакы солбуйааччы Мария Турантаева оҥордо. Санатан эттэххэ, быйыл судаарыстыбаннай бырагырааманы сүрүннээччинэн СӨ Култууратын уонна духуобунай сайдыытын министиэристибэтэ анаммыта. Үбүлээһин кээмэйэ 100 мөл. солк. тэҥнэһэр. Судаарыстыбаннай бырагыраама түөрт биэдэмистибэннэй бырайыактаах. Манна судаарыстыбаннай, дьиҥ таһымнаах тыллар оруолларын үрдэтии, Саха сиригэр тыллар туруктарын чинчийии, үөрэтии хаачыстыбата, үөрэтии мэтиэдикэтигэр саҥаны киллэрии, көдьүүстээх иһитиннэрэр эйгэни тэрийии боппуруостара киирэллэр.