Тылы харыстааһыҥҥа уонна сайыннарыыга судаарыстыба бырагыраамата олоххо салгыы киллэриллэр

2025 сылга “Саха Өрөспүүбүлүкэтигэр судаарыстыбаннай уонна официальнай тыллары харыстааһын уонна сайыннарыы” эрэгийиэннээҕи бырагыраама тэрээһиннэрин олоххо киллэриигэ өрөспүүбүлүкэ бүддьүөтүттэн 100 мөлүйүөн курдук үп көрүлүннэ.

Санатан эттэххэ, Ил Дархан Айсен Николаев сорудаҕынан судаарыстыбаннай бырагырааманы үбүлээһин 2023 сылтан икки төгүл улаатта.

Социальнай суолталаах, научнай уонна научнай-бырактыычаскай тэрээһиннэри ыытыы былааннанар. Олор ортолоругар саха суругунан литературатын 125 сылыгар аналлаах  саха суруйааччыларын төрөөбүт сирдэринэн научнай-бырактыычаскай кэмпириэнсийэ, литература эспэдииссийэтэ  бааллар.

Үгэс курдук,  Ил Дархан бириэмийэтэ туттарыллыаҕа. Судаарыстыбаннай уонна  официальнай сырдатыыга аналлаах бырайыактарга  Ил Дархан Гранын биэриэхтэрэ.

“Төрөөбүт тыл – норуот баайа” социальнай суолталаах бырайыактар куонкурустарын  түмүктэринэн бастыҥ муниципальнай тэриллиилэр судаарыстыба өйөбүлүн ылыахтара.