Түмэлгэ саха таҥаһын быыстапката аһыллыаҕа

Аан дойду дьахталларын күнүн уонна Саха сиригэр Норуот маастарын күнүн көрсө, кулун тутар 3 күнүгэр, Емельян Ярославскай аатынан түмэлгэ «Күүтүүлээх күндү таҥалай сон» диэн быыстапка аһыллыаҕа.

Быыстапкаҕа түмэлгэ харалла сытар XVIII-XX үйэтээҕи сэдэх эспэнээттэр уонна былыргыны үтүгүннэрэн тигиллибит таҥастар көрдөрүүгэ туруохтара диэн түмэл пресс-слууспата иһитиннэрэр.

Кэрэхсэбиллээҕэ диэн, бу быыстапка чэрчитинэн, түүлээҕи таҥастыырга, тигэргэ маастар-кылаастар буолуохтара. Маны тэҥэ, XVIII үйэтээҕи Болугур Айыытын көмүүтүттэн булуллубут сиэҕэ суон сону сөргүтүүнү көрдөрүөхтэрэ. Бу кэнниттэн төгүрүк остуол буолуоҕа, онно эспиэрдэр саха норуотун култуурунай нэһилиэстибэтин харайар, тарҕатар, сырдатар туһунан кэпсэтиэхтэрэ.

«Күүтүүлээх күндү таҥалай сон» быыстапка муус устар 7 күнүгэр диэри түмэлгэ көрдөрүүгэ туруоҕа.

Саха сиригэр Норуот маастарын күнэ кулун тутар 5 күнүгэр буолар. Былырыын 1700 киһи сахалыы таҥнан-симэнэн баран, киин куорат устун сэлэлии хаампыттара. Сылтан сыл Норуот маастарын күнэ далааһыннанан иһэр, бу курдук араас хабааннаах тэрээһиннэр ыытыллаллар.