Тымныы Оҕонньор уонна Хаарчаана өҥөтө төһө буоларый?

Саҥа Дьыл чугаһаабытынан Саха сирин олохтоохторо дьиэлэригэр, «утренниктарга» уонна тэрилтэлэрин киэһэлэригэр Тымныы Оҕонньору уонна Хаарчаананы ыҥыраллара элбиир. Куоракка аниматордар өҥөлөрүн сыаната балачча уратылаах: саамай чэпчэкитэ 1400 солкуобайтан саҕаланар, оттон ахсынньы 31 күнүгэр сыана хас да төгүл үрдүүр.

Биллиилээх биллэрии сервистэригэр оҕолорго анаан оонньуулаах, күрэстээх эҕэрдэлээһин өҥөтүн оҥороллор. Артыыстар араас саастаах оҕолорго дьиэҕэ тиийэн, Тымныы Оҕонньор уонна Хаарчаана чаҕылхай бырагыраамаларын көрдөрүөх буолаллар. Хаарчааналаах Тымныы Оҕонньортон 5, 15, 30 мүнүүтэлээх эҕэрдэ 3000 солкуобайтан саҕаланар. Соҕотох Тымныы Оҕонньору ыҥырыы 2000 солкуобай сыаналаах. Оттон тэрилтэлэр киэһэлэригэр уонна «утренниктарга» сыана балачча үрдүүр: Тымныы Оҕонньор өҥөтө – 5000 солкуобай, оттон иккиэннэрин ыҥырыы – 8000 солкуобай.

Саҥа Дьыл иннинэ Дьокуускайга сыана эмиэ уратылаах. Холобур: ахсынньы 28-30 күннэрэ – 2000 солк. , ахсынньы 31 күнүгэр сарсыарда 10:00-тан 16:00 чааска диэри – 3500 солк., ахсынньы 31 күнүгэр 16:00 чаастан түүн 02:00-гэ диэри – 4500 солк.

Дьокуускайга  уопуттаах идэтийбит тыйаатыр артыыстара эмиэ үлэлииллэр. Кинилэр бэлиэтииллэринэн, өҥөлөрүн сыанатын төлөпүөнүнэн эрэ билсиэххэ сөп.