“Тымныы оҕуһа” саҥа кинигэлиин кыһыҥҥы остуоруйа дойдутугар айанныаҥ

“Айар” кыһа “Тымныы оҕуһа”  диэн анимационнай ойуулук матыыбынан  олус сонун кинигэни оҥорон, ааҕааччыларыгар бэлэх уунна.

Ойуулугу «Tundra» анимация устуудьуйата устубута. Ойуулук хайыы үйэ Саха сиригэр уонна омук сирдэригэр улахан  сэҥээриини ылбыта. 2023 сыллаахха Торонтоҕа  «imagineNATIVE»  норуоттар икки ардыларынааҕы киинэ улахан бэстибээлигэр “Төрөөбүт тылынан бастыҥ киинэ” номинация бириэмийэтинэн наҕараадаламмыта.

Истиҥ доҕордоһуу, Саха сирин кырыа кыһынын уонна муус оҥоһуктарын туһунан кэпсиир “Тымныы оҕуһа” кинигэни «Tundra» устуудьуйа сценариһа Татьяна Ушницкая хомуйан оҥордо. Татьяна “Муҥха”, “Таҥха” диэн бырайыактарга үлэлээбитэ.

Кинигэҕэ муус оҥоһуктары оҥоруон уонна муус маастара Бүөккэ оҕонньорго  тиийэр ыра санаалаах Айаал диэн ааттаах уол туһунан кэпсэнэр. Ыра санааҕа чугаһыыр долгутуулаах кэм – Тымныы оҕуһун оҥорорго маастарга көмөлөһөр кэм тиийэн кэлэр. Ыра санаа чахчы туолуоҕун туох мэһэй баар буолан хааларый? Дьэ, ону эн кинилэрдиин бу кинигэ иһигэр киирдэххинэ эрэ билиэҥ.  Айаал уонна Бүөккэ оҕонньор  доҕордоһууларын туһунан үтүө санаалаах устуоруйа ааҕааччылары муус оҥоһуктар скульптораларыгар аҕалар. Ааҕааччы кинигэ дьэрэкээн ойууларын батыһан, Саха сирин биир дэриэбинэтигэр кыһыҥҥы алыптаах эйгэҕэ баар буолан хаалар.

“Айардар”  таһаарбыт кинигэлэрин иһигэр алыптаах остуоруйаны эрэ билсибэккин.  Ону сэргэ, кинигэ дьоруойдарын кытары мүччүргэннээх  сырыыларга айаннаһаргар  көрдөөх комикстаах  уонна 10 оонньуулаах былакаат, бэлэх постердар бааллар.

Татьяна Ушницкая кэпсээбитинэн, быйыл кыһын өссө “Таҥха” диэн анимационнай ойуулук тахсыахтаах. Бу ойуулук Саха сирин култууратын туһунан кыһыҥҥы устуоруйалар сиэрийэлэрин  түмүктүүр бырайыагынан буолуоҕа.

Кинигэни хайыы үйэ атыылаһан аахпыт дьон “Тымныы оҕуһа” төрөппүттэр, эбээлэр-эһээлэр оҕолорун уонна сиэннэрин төрөөбүт тылларынан үөрэтэллэригэр олус көмөлөөҕүн бэлиэтииллэр. Оҕоҕо өйдөнүмтүө тылынан суруллубут кинигэни ааҕа-ааҕа кырачааннаргытын кытары бииргэ оонньоон, сэргэхсийиҥ. Хайа уонна  Сахабыт сиригэр сынньана кэлбит кырачаан да, улахан да дьоҥҥо Саха бэртээхэй бэлэх буолара саарбаҕа суох.