Тымныы полюһугар Өймөкөөҥҥө хочуолунайдар ититиини балаҕан ыйын 6 күнүгэр биэриэхтэрэ

Бу күннэргэ тымныытынан аатырар Тымныы полюһугар — Өймөкөөҥҥө сытыы тыал, күн аайы ардах түһэ турар. 

Онон олохтоохтор хаһааҥҥытааҕар да ититииини кэмигэр биэрэллэрин күүтэллэр. «Теплоэнергосервис» ХЭТ хочуолунайдарыгар ититии сезона балаҕан ыйын 6 күнүттэн саҕаланыаҕа. Бу туһунан «Теплоэнергосервис» АУо Өймөкөөннөөҕү салаатын салайааччыта Максим Ямщиков иһитиннэрдэ.

— Биһиэхэ быһаччы холбоммут эбийиэктэр бары сылааһынан хааччыллыахтара, бастатан туран, бу социальнай инфраструктура эбийиэктэрэ – уһуйаан, оскуола, балыыһа уо.д.а. Оттон олорор дьиэлэргэ улуус киинигэр – управляющай хампаанньалар, нэһилиэктэргэ – хочуолунайдар маастардара дьаһайыахтара, — диэн Максим Ямщиков бэлиэтээтэ.

Онон Өймөкөөҥҥө ититии сезона кэмигэр саҕаланарын олохтоохтор эрэнэ кэтэһэллэр.