Тымныы полюһугар Өймөкөөҥҥө Куйдуһун муостата тутуллар (видео)

Ситэриилээх былаас отчуотун кэмигэр Өймөкөөн улууһун олохтоохторун кытта көрсүһүүгэ оробуочай бөлөҕү салайар СӨ тырааныспарка уонна суол хаһаайыстыбатыгар миниистир Владимир Сивцев аара Куйдуһун муостатыгар анаан тохтоон, туох үлэ ыытыллан эрэрин билсибитин билиһиннэрбитэ уонна олунньу 26 күнүттэн суолталаах үлэ саҕаланарын туһунан иһитиннэрбитэ.

Лоп курдук этиллибит кэмҥэ үлэ күөстүү оргуйан барбыта. Бүгүҥҥү күҥҥэ 296 м уһуннаах  Куйдуһун муостатын тутуу икки хайысханан барар – эргэни көтүрүү уонна буровой тэрили туруорууга суолу оҥоруу.

— Тутуу матырыйаала барыта төлөнөн, Улан Удэтээҕи “Сталь-Мост” тэрилтэттэн 5 массыына муоста тутар матырыйаал кэлэн иһэр. Бэлэм тимир конструкциялар кулун тутар 5 күнүгэр Куйдуһуҥҥа тиийиэхтэрэ. Дьокуускайтан 320 кууб тутуу матырыйаалын ыытыахпыт. Аллараа Бэстээхтэн тирэх буолар турбалар кэлиэхтэрэ. Сэттэ муоста сиһин (пролету) уларытабыт, — диэн үлэ хаамыытын билиһиннэрэр “СтройМост” ХЭУо дириэктэрин солбуйааччы Афанасий Титов.

Бу күннэргэ ыытыллар үлэ хаамыытын салайааччы видеоҕа устан, хаартыскаҕа түһэрэн ыытта.

Онно көстөрүнэн, 1979 сыллаахха тутуллубут  эргэ мас муоста устуоруйаҕа киирэр түгэнэ үүннэ.

Аны аҕыйах хонугунан манна саҥа муоста тутуллан дьэндэйиэҕэ.

Сиһилии Тымныы полюһа Өймөкөөн улууһугар Куйдуһун муостатын тутуу туһунан «Саха сирэ» хаһыат бээтинсэтээҕи нүөмэригэр ааҕыҥ.