Тымныы полюһугар Өймөкөөҥҥө кыһыҥҥы туризм бэстибээлэ 22-с төгүлүн ыытылынна

«Тымныы полюһугар Өймөкөөҥҥө айан» кыһыҥҥы туризм бэстибээлэ Өймөкөөн улууһугар да, өрөспүүбүлүкэҕэ да туризмы сайыннарыы стратегическай боппуруостарын олоххо киллэриигэ улахан суолталаах былаһаакканан буолар.

Бу күннэргэ улууска  22-с төгүлүн ыытыллыбыт бэстибээл туһунан Томтор нэһилиэгин баһылыга Алексей Винокуров маннык сырдатта:

— Сыстыганнаах дьаҥынан сибээстээн тохтотулла сылдьан баран, быйыл өрөспүүбүлүкэтээҕи Олоҥхо Ыһыаҕын кэнниттэн “Көмүс күрүө” этнографическай комплекска  бэстибээл бастакытын буолла.

Биллэн турар, Олоҥхо Ыһыаҕар тутуллубут “Көмүс  күрүө” этнографическай комплекс эбийиэктэрэ бэстибээли ыытыыга саҥалыы тыыны киллэрдилэр. Быйыл скайраннинг курдук саҥа көрүҥ уонна бураанынан сүүрдүү бэстибээлгэ эрчимнээх тэтими эбэн биэрдилэр.

Хайаҕа сүүрэн тахсыыны кыттааччылар да, көрөөччүлэр да биһирээтилэр. Бэстибээл туһунан чаҕылхайдык сырдатыыга суруналыыстары уонна блогердары угуйуу ордук наада эбит. Быйыл биллиилээх блогердар Панда Саха уонна Ивашка Шоу кэлиилэрэ нэһилиэк олохтоохторугар сонун сүүрээнинэн буолла.

Кыһыҥҥы туризм бэстибээлин курдук улахан тэрээһин дьону үөрдэр тэрээһининэн эрэ буолбакка, араас интэриэстээх дьону түмэр. Инникитин өссө да умнуллубат өйдөбүллэр баар буолуохтарыгар эрэнэбин. Холобура, дойдуга саамай биллэр Тымныы Моруостары ыҥырар ордук буолуо этэ. Татаар Кыш-Бабаайа уонна Карелия Паккайнета Тымныы полюһун биир бэстибээлигэр күндү ыалдьыттарынан буолбуттара, билигин да үтүө өйдөбүл буолан сылдьар. Култуурунай бырагырааманы тэрийээччилэр – Томтордооҕу Култуура дьиэтэ уонна Оҕо ускуустубатын оскуолата ситимнээх үлэлэрэ бырааһынньык ситиһиилээхтик ыытылларыгар тустаах  олугу уурда. Бэстибээли умнуллубаттык ыытыыга бары кыахтарын уонна күүстэрин уурбут дьоҥҥо истиҥ махталбын тиэрдэбин. Нэһилиэк таһымыгар ыытыллыбыт туризм бэстибээлэ  улуус олохтоохторо улахан тэрээһиннэри тэрийэр уопуттарыгар олоҕуран ааста.