Тымныы полюһун мас-муус таһар Лэкээтэ аатырыан аатырда

Соторутааҕыта Лэкээ ыт хаһаайынын кытта сылдьан тэҥҥэ муус, мас таһара социальнай ситимнэргэ тарҕаммытын көрөн, үгүс киһи соһуйбута, сөхпүтэ. 

Ыт хаһаайына Павел Заболоцкай биэс оҕолоох иллээх дьиэ кэргэн аҕата, Өймөкөөн улууһун Үчүгэй нэһилиэгин төрүт олохтооҕо. Кини нэһилиэк хочуолунайын маастарынан үлэлиир.

— Лэкээ — лабрадор «английскай, европейскай» дэнэр күндү боруода ыт. Кыыспыт Динара оҕо эрдэҕиттэн ыт саҕа таптыыра суох. Онон Лэкээ — кини ыта.  Тымныы полюһугар, биһиэхэ, күндү боруода дэммэккэ, от-мас тиэйээччи буола сылдьар. Лэкээ  булка анаммыт ыт. Ити боруоданы «кус аҕалар ыт» дииллэр.  Туох да үөрэтии наадата суох, иһиттэн итинник тугу эрэ үлэлии сылдьар ыт. Томтортон быраатым Иван Заболоцкай үс сыллааҕыта саҥа төрөөбүт ыт оҕотун ыыппыта. Биир сааһыгар хабдьыны бултаан аҕалара. Дьон куска уларсааччылар. Хамаандалаатыҥ эрэ — эйиэнэ. Наһаа сымнаҕас. Өйүн иһин  «Лэкээ» диэн ааттаммыта. Уҥуоҕунан кыра гынан баран, лис курдук кытаанах эттээх. Үлэһитин курдук аһас ыт. Идэһэттэн хаалбыт киһи сиэбэт аһа барыта — киниэнэ. Онон идэһэ аһыттан сайыннары аһыырын эрдэттэн уурунабыт. Сарсыардаттан миигин кытта тэҥҥэ сылдьан мууһун, маһын таһан баран, үлэһит сиэринэн миискэтин ытыра сылдьар. Ол аата аһа бэлэм буолуохтаах. Түүтэ чараас буолан, дьиэҕэ сытар. «Англичанин» үлэлээн тигинэйэр буоллаҕына, кырдьаҕас ыппыт көрөн баран аһыы-аһыы сытан тахсар, — диэн кэпсиир Павел Заболоцкай.

«Атыыр дуу, тыһы дуо?» диэн ыйыппыппар, ыт хаһаайына «кийиит көрдүүр туһунан толкуйдуу сырыттахпытына, номнуо «бу Лэкээ оҕото» диэн бэйэтин курдук хара ыт оҕотун кытта билиһиннэрбиттэрэ. Уол оҕото, үспүөйдээн лаайканы кытта булса охсубут. Онон туйах хатарааччылаах. Үлэтин быыһыгар сүүрэн тиийэн, ыппыт өссө оҕолоно сылдьар» диэн хоруйдаата.

Лэкээ видеота хайдах уһуллубутун ыйыппыппар, Павел Заболоцкай «куоракка үлэлиир балтым иллэрээ сыллааҕыта устан барбытын дьонугар ыыппытын, тарҕатан кэбиспиттэр этэ. Ол устуу «Сонуннарга» кытта тиийбит этэ.

Онон балтым «үлэтигэр туһаннын» диэн быйыл эбии устан ыыппытым ити тарҕаммыт этэ. Онон Лэкээбит өрөспүүбүлүкэҕэ биллэр ыт буолла«,- диэн  кэпсээтэ. Дьэ, ити курдук Үчүгэй Заболоцкайдарын ыттара дьиэ кэргэн саамай күндү чилиэнэ буолан, иллээх ыал күннэрэ Лэкээнэн тахсар.

… Соторутааҕыта өйүмэҕэ көҕөн уста сылдьарын суруйбутум, батсаабы бараабыта. Аны билигин Үчүгэй Лэкээтин сырдаттым. Онон Тымныы полюһа Өймөкөөн  тымныытынан эрэ буолбакка, ытынан-куһунан кытта дьону соһутар айылгылаах үтүөкэннээх дойду!