Тымныы полюһун Сордоҥнооҕор эргэ дьиэлэри көтүрэр соруктаахтар

Тымныы полюһа Өймөкөөн улууһун Сордоҥноох нэһилиэгэ сыл аайы норуот көҕүлээһинин  (ППМИ) бырайыагар кыттар.

Нэһилиэк баһылыга Альберт Вензель бу кэскиллээх хамсааһыҥҥа кыттыы туһунан санаатын маннык үллэһиннэ:

— Биһиги сыл аайы ыытар сайаапкабыт учуоттанан, бырагыраама куонкуруһугар кыайыылааҕынан тахсан, кэлиҥҥи сылларга нэһилиэкпит биллэ тубуста, саҥа тутуу үксээтэ. Ол курдук, нэһилиэк култуурунай паарката, өрөспүүбүлүкэҕэ аатырбыт сайыҥҥы бассейн, спортивнай былаһаакка, оскуола өрөмүөнэ, «АгроМаш-90 ТГ» тыраахтарбытыгар саппаас чаастарын булуу — нэһилиэкпит тыын боппуруостара норуот көҕүлээһинин бырагырааматын чэрчитинэн олоххо киирбиттэрэ. 

Быйылгы мунньаҕынан нэһилиэк олохтоохторо эргэрбит, хаарбах туруктаах туһаттан тахсыбыт дьиэлэри уонна эбийиэктэри көтүрүүгэ туһаайдылар.

Онон үбүлээһини маннык аттарар буоллубут: өрөспүүбүлүкэ көрөр бүддьүөтүттэн 2 мөлүйүөн солкуобай, олохтоох бүддьүөттэн — 200 тыһыынча солкуобай, олохтоох нэһилиэнньэ – 60 тыһыынча солкуобай, «Биэрэк Үрдэ» ХЭУо — 150 тыһыынча солкуобай. Онон уопсайа бырайыакпытыгар 2 410 000.00 солкуобай наада.  

Сордоҥноох нэһилиэгин олохтоохторо өрөспүүбүлүкэ салалтатыгар, Үп министиэристибэтигэр бу маннык норуот көҕүлээһинин  (ППМИ) бырайыагын тэрийэн ыытарыгар барҕа махталын тиэрдэбит. 

… Өрөспүүбүлүкэ нэһилиэктэрин аайы эргэ дьиэлэр, хотоннор тас көстүүнү «буортулаан» тураллара баар суол. Онон бэрт кэскиллээх былаан — быйылгы бырайыактар куонкурустарыгар сордоҥноохтор сайаапкалара эмиэ болҕомтоҕо ылыллан, эргэ дьиэлэри көтүрэр бырайыактара олоххо киирэригэр баҕарабыт.