Түмсүү күүһэ, алгыс тыына — Ньурбалар Запорожьеҕа сэргэ туруоруохтара

Ньурба улууһун дэлэгээссийэтэ Запорожье уобалаһыгар саха норуотун ытык бэлиэтин – алгыстаах сэргэни туруоран, ийэ дойдуну кытта ситими бөҕөргөтөр, байыастар санааларын күүһүрдэр соруктаах үлэлии-хамсыы сылдьар. Бу туһунан улуус баһылыга Алексей Иннокентьев бэйэтин ТГ-ханаалыгар иһитиннэрдэ.

Ньурбалар оробучоай сырыыларын «ураты суолталаах» диэн бэлиэтииллэр. Сүрүн соруктарыттан биирдэстэрэ – саха киһитэ дьөһөгөй оҕотун баайар, ытыктыыр итэҕэл маһын, түмсүү бэлиэтин сэргэни туруоруу. «Балаҕан ыйын 1 күнүгэр сэргэбит айаннаан кэллэ. Запорожскай уобалас Куйбышевскай оройуонун баһылыгын, оройуон атамаанын, «Биир ньыгыл Арассыыйа» баартыйа чилиэнин кытары көрсөн, сэргэ турар ытык сирин быһаарыстыбыт», – диэн кэпсиир Алексей Иннокентьев. Дэлэгээссийэ сырыыта ньурбалар биир сомоҕо буолан, байыастарыгар көмө оҥорон, өссө биир чаҕылхай холобурунан буолар. Дэлэгээссийэ Мариупольга, Херсонскай, Запорожье уобаластарыгар тиийэн, биир дойдулаахтарыгар анаан хомуллубут гуманитарнай көмөнү тиэрдэр. Көмө иһигэр матасыыкыл, массыына саппаас чаастара, харысхаллар, Сата уустара уһаарбыт быһахтара, «Көмүскэл» сыах тикпит таҥастара, дроннар, генератордар, ботуруоннар, ас-үөл уонна норуот эмчитэ, алгысчыт Алиса Иннокентьева хомуйан ыыппыт эмтээх отторо-мастара бааллар.

Улуус баһылыга бу сырыы дириҥник долгуппутун, байыастары кытта көрсүһүү үөрүүтүн туһунан санаатын үллэстэр: «Байыаннай дьайыы саҕаланыаҕыттан байыастарбыт санааларын бөҕөргөтөн, дойдуларыттан Ньурбам дьоно-сэргэтэ бэлэмнээн ыыппыт аадырыстаах баһыылкаларын тиксэрэ бу диэки кэлэбит-барабыт. Бу сырыыга соһуччу аан маҥнайгытын штурмовой этэрээт аатыттан махтал суругу тутан олус долгуйдум. Киһиэхэ кыра да наада. Уолаттар төрөөбүт дойдуларын аһын – сылгы, ынах этин тутан үөрэллэр, көмө иһин улахан махталларын тиэрдэллэр».

Маны таһынан, биир дойдулаахтара Арассыыйа Дьоруойа Андрей Григорьев-Тута аатыттан «Саха Дрон» тэрилтэ оҥорбут икки дронун туттардылар. Оттон Ньурбатааҕы ускуустуба оскуолатын дириэктэрэ, СӨ үтүөлээх артыыһа Илья Николаев сахалыы сиэри-туому толорон, аал уоту оттон алгыс тылларын эттэ. Түмүктээн эттэххэ, Ньурба дэлэгээссийэтин сырыыта байыаннай дьайыы кэмигэр тыыл уонна фронт ситимэ быстыбатын, норуот түмсүүтэ, байыастарын өйөөһүнэ күүстээҕин көрдөрөр чаҕылхай түгэнинэн буолар.