Түмсүү үлэтэ — нэһилиэк олоҕо

Нам улууһугар Аппааныга нэһилиэк иһинэн үлэлиир бэтэрээннэр түмсүүлэрэ ааспыт сылга туох үлэ ыытыллыбытын  сыаналаатылар итиэннэ бу сыллааҕы былааннарын торумнаатылар.

Ааспыт сылга тиһиктээхтик ыытыллыбыт иис, ырыа куруһуоктарын, субуотунньуктарга көхтөөх кыттыыны аҕам саастаахтар астыммыттарын, быйыл да ити куруһуоктар салҕанан баралларыгар эрэллээхтэрин биллэрдилэр. Салгыы быйылгы былааны ыйдарынан аттаран торумнааһыҥҥа бэйэлэрин санааларын үллэһиннилэр, этиилэри киллэрдилэр. Ол курдук, үүнээйи арассаадатын олордорго, дуобат куруһуогун эбэн биэрэргэ, «Аҕа, эһэ, хос эһэ — эр дьон бастыҥнара» түмсүү үлэтин саҕалыырга (эпп.Д.М.Елисеев), нэһилиэк талба талааннаахтарын быыстапкатын оҥорорго, оҕуруот аһын олордууга, көрүүгэ-харайыыга туһалаах сүбэлэри, маастар-кылаастары тэрийэргэ, Кыайыы болуоссатыгар сибэкки олордорго, күрэхтэһиилэри, куонкурустары тэрийэн ыытарга этиилэр киллэрилиннилэр. Үлэҕэ-хамнаска бары көхтөөхтүк кыттар баҕалаахтарын, сонуну, саҥаны толкуйдаан олоххо киллэрэргэ бэлэмнэрин эттилэр.

Нина Саввина,

Аппааны, Нам.

Хаартыскалар ааптар тиксэриилэрэ.