Түмсүүлээх кылаас үтүө үгэһэ

Биһиги, бииргэ үөрэммиттэр, төһө да сааһырбыппыт, бары атын-атын улууска, нэһилиэккэ олорбуппут иһин, сибээһи ыкса тутабыт. 

Тыйаатырдарга, санаторийдарга, сир астыы тыаҕа тутуспутунан сылдьарбыт үтүө үгэскэ кубулуйда. Атырдьах ыйын бүтэһик күннэригэр Өлүөнэ эбэбит уҥа биэрэгэр турар «Песчаная гора» диэн турбаазаҕа баран отонноон, сынньанан, олус астынан кэллибит. Бу турбааза үлэтэ билигин кылгас кэмҥэ тохтоон турбутун да иһин, хаһаайын Юрий Прокопьевич Ермолаев оҥочонон туоратан, 7 миэстэлээх ыалдьыттарга анаммыт дьиэҕэ түһэрэн, наадыйар тэриллэринэн хааччыйан, ыраата барбакка дьиэбит таһыттан отонноотубут. Сибиэһэй салгыҥҥа астына сынньанныбыт.

Бааза дьиэлэрин тулатыгар мастар силистэриттэн чочуллубут ураты кэрэ оҥоһуктар болҕомтону тардаллар. Манна остуоллаах, ыскамыайкалаах, олорон сынньанар анал миэстэлэрдээх, спортивнай былаһааккалардаах.

Биһиги манна аҕам саастаахтарга анаан сынньанар, доруобуйаны тупсарар, чэбдигирдэр лааҕыр үлэлиирэ буоллар диэн баҕа санаабытын тиэртибит.

Бааза үлэтэ өссө кэҥээн, улууспут, өрөспүүбүлүкэбит дьоно-сэргэтэ, ыраахтан ыалдьыттар сөбүлээн сынньанар сирдэрэ буоларыгар баҕарабыт.

Нина Саввина,

Аппааны, Нам.

Хаартыскалар: Н.Саввина тиксэриилэрэ