Тырааныспар кирэдьиитэ чэпчиир, ирдэбилэ уларыйар

Киин Баан от ыйыгар сүрүн ыстаапканы 18%-ҥа диэри намтатан, атырдьах ыйыгар суоппардарга тырааныспар кирэдьиитин ыстаапката чэпчиэҕэ, диэн «Рольф» хампаанньаҕа бэлиэтээтилэр.

Регулятор сүрүн ыстаапкааны тута 2%-нан намтаппыта – бу ырыынакка улахан хамсааһын.  Ол түмүгэр, тырааныспар кирэдьиитин бырагырааматын этиилэрэ ортотунан 1,5-2% чэпчээн, ордук табыгастаах буолуохтара.

Урут тырааныспар кирэдьиитин орто бырыһыана 13% кэриҥэ эбит буоллаҕына, билигин  түһэн 11,5-12% диэри намтыаҕа. Ыстаапка түһэрин кытта «Бастакы массыына» уонна «Дьиэ кэргэн массыыната» курдук судаарыстыбаннай кирэдьиит бырагыраамалара барыыстара улаатар.

Эспиэрдэр этэллэринэн, дойду үрдүнэн  Lada (Granta, Vesta, Niva), УАЗ, ГАЗ, «Москвич» мааркалаах тырааныспарга ону таһынан дойду иһигэр оҥоһуллар Haval уонна Evolute мааркаах массыыналарга ордук наадыйыы үрдүүр. Бу массыыналар сыаналара 2 мөл. солк. диэри буолан, үксүгэр судаарыстыба өйөбүлүгэр хапсаллар.

Арассыыйаҕа чэпчэтиилээх массыына кирэдьиитин ыларга дохуот ирдэбилэ көннөрү массыынаҕа – 79 тыһ. солк., оттон электромобильга – 267 тыһ. солк. саҕаланар. Чэпчэтиилээх кирэдьиит ыйдааҕы төлөбүрэ эрэгийиэнтэн тутулуктанан ортотунан көннөрү массыынаҕа – 35-40 тыһ. солк., электромобильга – 196 тыһ. солк. тэҥнэһэр.