Тырааныспар систиэмэтин тупсарыыга саҥа көҕүлээһиннэр уонна былааннар

Дьокуускай куорат баһылыга Евгений Григорьев суруналыыстары кытары көрсүһүүтүгэр киин куорат тырааныспарын инфраструктуратын тупсарыыга былааннарын туһунан үллэһиннэ.

Кини этэринэн, куорат таһынааҕы маршруттарга биир пассажиры таһыы сыаната 200 солкуобайга тиийэр. Маннык сыана оптуобустар куорат “пробкатыгар” уһуннук туралларынан быһаарыллар, ол уопсастыбаннай тырааныспар үлэтигэр куһаҕаннык дьайарын бэлиэтээтэ.

Куорат олохтоохторо оптуобуһунан сылдьалларыгар Дьокуускай куорат дьаһалтата сыл ахсын Дьокуускайдааҕы пассажирскай автотранспортнай тэрилтэҕэ 150 мөлүйүөн солкуобай субсидияны көрөр.

Салгыы мээр тупсарыы бэрээдэгинэн, 2026 сылга былааннаммыт сүрүн тэрээһиннэртэн биирдэстэринэн «Белое озеро» ырыынак уонна Мэдиссиинэ киинин оройуонугар пассажирдары биир оптуобустан атын оптуобуска көһөрүүнү хааччыйар пууну арыйыы буоларын бэлиэтээтэ. Бу бырайыак тырааныспар систиэмэтин оптимизациялааһыҥҥа туһуланар, ол ороскуоту аҕыйатыыга уонна маршруттар көдьүүстэрин үрдэтиигэ тиэрдиэхтээх. Бу, куорат олохтоохторо уопсастыбаннай тырааныспарынан сылдьыыларын көдьүүстээх оҥоруохтаах.

Ону таһынан, суол инфраструктуратын тупсарыы чэрчитинэн уулуссалары кэҥэтии уонна суол ситимин саҥардыы былааннанара этилиннэ. Инники күөҥҥэ турар соруктартан биирдэстэринэн, Вилюйскай быстах туоруур уулуссаны (переулок) Окружной шоссеҕа диэри уһатыы уонна аспааллааһын буолар. Ону таһынан Петр Алексеев уулуссатыттан Окружной шоссеҕа диэри саҥа суолу тутуохтара, бу Бүлүүлүүр суолга тырааныспар сырыытын чэпчэтиэҕэ диэн буолла.

Өссө биир өр сылларга кыайтарбатах кыһалҕанан буолбут, Короленко уулуссатын харгыһа буолар. Бу уулусса “Кыайыы 50 сыла” успуорт дыбарыаһын кэннинээҕи муостаттан салҕыы олохтоохтор “көмөлөрүнэн” сабыллыбыта быданнаата. Мэр эппитинэн, манна улахан үлэ, олохтоохтору кытары “аһаҕас истии” баран, бүтүннүү «аһыллыах» курдук буолбут.  Дьиҥэ бу уулусса аһыллара буоллар, кэккэлэһэ сытар уулуссалар ноҕоруускалара кыччыа этэ. Ону баара, аны Ломоносов уулуссатын 29 дьиэтэ эбии мэһэйдэри үөскэппит.

Дьэ ити курдук, тырааныспарын систиэмэтин оптимизациялааһыҥҥа уонна суол инфраструктуратын кэҥэтиигэ суолталаах соруктар тураллар.