Тырааныспар уонна суол хаһаайыстыбатын министиэристибэтин үлэһиттэрэ Өймөкөөҥҥө чөлүгэр түһэрии үлэтигэр кытыннылар

Бу күннэргэ Өймөкөөн улууһугар айылҕа иэдээнин – халаан содулун туоратыы салгыы ыытыллар.

«Өймөкөөҥҥө ардах уутуттан биэс нэһилиэк эмсэҕэлээтэ, уу иккитэ кэлэн ааста. Гидрологтар этэллэринэн, маннык үрдүк таһымнаах уу 2013, 2018 да сылларга бэлиэтэммэтэх. Чөлүгэр түһэрии үлэтэ балаҕан ыйа бүтүөр диэри түмүктэниэхтээх диэн өрөспүүбүлүкэ салалтата сыал-сорук туруорар«, – диэн СӨ экологияҕа, айылҕаны туһаныыга уонна ойуур хаһаайыстыбатыгар миниистирин солбуйааччы Анатолий Алексеев «Саха» НКИХ «Олох үөһүгэр» биэриитигэр Өймөкөөҥҥө ардах халаанын туһунан кэпсэтиигэ кыттарыгар бэлиэтээбитэ.

Халаан содулун туоратыыга, чөлүгэр түһэрии үлэтигэр үгүс министиэристибэттэн, улуустан тутуу биригээдэлэрэ кэлэн үлэлээтилэр. Кинилэр ортолоругар СӨ тырааныспар уонна суол хаһаайыстыбатын министиэристибэтэ эмиэ баар.  Атырдьах ыйын бүтэһик, балаҕан ыйын саҥатын устата үлэлээбит бу министиэристибэ ыстаарсай судаарыстыбаннай иниспиэктэрэ Юрий Егоров ыытыллыбыт үлэ туһунан маннык билиһиннэрдэ;

— Миниистир Владимир Сивцев сорудаҕынан тырааныспар уонна суол хаһаайыстыбатын министиэристибэтин уонча үлэһитэ: суол хаһаайыстыбатын управлениетыттан, министиэристибэттэн бэйэтиттэн, “Арктика суоллара” тэрилтэттэн – иккилии, “Ленский мост”, “Жатайдааҕы судоверфь”, “Полярнай авиалиниялар” хампааньалартан – биирдии киһи кэлэн, Биэрэк Үрдүгэр ууга барбыт дьиэлэри чөлүгэр түһэриигэ үлэлээтибит. Бары бэйэбититтэн тэриллэрдээх тиийбиппит. Биһигини уһуйааҥҥа аһата сырыттылар. Онон бары күүспүтүн, кыахпытын ууран, үлэ араас көрүҥүн оҥордубут.

Ити курдук, халааҥҥа түбэспит дьоҥҥо ким дьиэлэри чөлүгэр түһэриигэ, ким гуманитарнай көмөнү оҥорон, быһата, өрөспүүбүлүкэ барыта көмөлөһөн, өймөкөөннөр өрөспүүбүлүкэ уонна улуус салалталарыгар тэрээһиннээх үлэни ыыппыттарыгар махталлара сүҥкэн.