Тыыл бэтэрээнэ Федора Иванова 103 сааһын туолла

Дьокуускай куорат олохтооҕо, тыыл бэтэрээнэ  Федора Иванова 103 сааһын туолла. Куорат баһылыгын солбуйааччы  Владимир Аржаков бүгүн   Федора Николаевна Иванованы бу үөрүүлээх күнүнэн эҕэрдэлээн туран,   Дьокуускайга бастакынан «80 лет Победы в Великой Отечественной войне 1941-1945 гг.» диэн  мэтээли  туттарда.

Владимир Аржаков  бэйэтин эҕэрдэтигэр Федора Николаевна тыылга тус кылаатын киллэриитин таһынан,  кини дьиэ кэргэнэ Саха сирин үөрэҕириитэ, педагогиката, билимэ сайдыытыгар дьоһун кылааттарын санатта. Владимир Владимирович  университекка үөрэппит Федора Николаевна быраатын — Иванов Василий Николаевиһы ахтан-санаан ааста. Кини уһун сылларга М.К. Аммосов аатынан Саха судаарыстыбаннай университетыгар преподавателлээбитэ.

Федора Николаевна 1922 сыл олунньу 14 күнүгэр Ньурба улууһугар Дьаархаҥҥа элбэх оҕолоох ыалга төрөөбүтэ. Чопчулаан эттэххэ, кини пааспарыгар төрөөбүт сыла 1926 с. диэн суруллубут. Ол гынан баран, архыып чахчыларын хасыһан, кини 1922 сыллаахха төрөөбүтэ чопчуламмыт.