Тыыл бэтэрээннэрин, сэрии сылларын оҕолорун улуустааҕы ыһыаҕа ыытылынна

Мэҥэ Хаҥалас улууһугар Ходоро нэһилиэгин сиригэр-уотугар Улуу Кыайыы үбүлүөйдээх 80 сылынан, тыыл бэтэрээннэрин, сэрии сылларын оҕолорун улуустааҕы ыһыаҕа ыытылынна.

Айыы ситимин олохтуур, төлкөнү түстүүр, саргыны салайар, дьолу тосхойор Ыһыах алгыһын түсчүт Зиновий Игнатьев алҕаан ыытта, түһүлгэ дьонун-сэргэтин куттарын тутан алгыс маанылаах тылын анаата.

Улуус баһылыгын бастакы солбуйааччы Василий Михайлов, Ходоро нэһилиэгин баһылыга Виктор Федоров, СӨ норуотун хаһаайыстыбатын үтүөлээх үлэһитэ, СӨ Ытык Сүбэтин бэрэссэдээтэлэ Люлия Григорьева, улуус бэтэрээннэрин Сүбэтин бэрэссэдээтэлэ Евдокия Решетникова, «Сэрии сылларын оҕолоро» Бүтүн Арассыыйатааҕы уопсастыбаннай тэрилтэ Саха сиринээҕи салаатын бэрэссэдээтэлэ Иннокентий Васильев ытык көлүөнэ дьоммутугар сүгүрүйүүбүтүн, махталбытын, киэн туттуубутун биллэрэн туран Үрүҥ Тунах ыһыаҕынан итии-истиҥ эҕэрдэлэрин эттилэр, наҕараадалары туттардылар.

Киин түһүлгэҕэ айар дьоҕурдаах, талба талааннаах дьоммут-сэргэбит ырыаларын-тойуктарын бэлэх ууннулар. Алгыс тылларын иҥэринэ иһиппит дьон тоҥолохтуу тутуһан оһуохайга киирдилэр. Оһуохайы СӨ Дархан этээччитэ Станислав Иванов таһаарда.

Ыһыах күн күндү дьоммут саха таҥаһын көрүүгэ, корнхол, мохсуо көрүҥнэригэр биирдиилээн бастыыр иһин күрэскэ итиэннэ фольклор көрүҥнэригэр бэрт үчүгэйдик бэлэмнэнэн кэлэннэр күрэхтэстилэр. Кыайыылаахтар грамотанан, мэтээлинэн, бирииһинэн наҕараадаланнылар.

Бэлиэ күн “Бочуот знага” уордьан кавалера, СӨ култууратын үтүөлээх үлэһитэ, ССРС култууратын туйгуна, СӨ култууратын уонна ускуустубатын Бочуоттаах үлэһитэ, Мэҥэ Хаҥалас улууһун Бочуоттаах олохтооҕо Дмитрий Дмитриевич Тихонов, олох-дьаһах коммунальнай хаһаайыстыбатын тэрилтэтин үлэһитэ Константин Скрябин, В.П. Ларионов аатынан Майа орто оскуолатын 1 кылааһын үөрэнээччитэ Леонард Захаров толорууларыгар Мэҥэлэр өрөгөй ырыаларынан түмүктэннэ. Бэлиэтээн эттэххэ, быйыл өрөгөй ырыабыт ылламмыта  30 сыла итиэннэ Дмитрий Дмитриевич өрөгөй ырыаны толорбут бастакы солист буолар.

Дьоллоох, уйгулаах олох иһин турууласпыт аҕа көлүөнэ дьоммутугар куруук махталлаахпыт, эһиги үтүө холобургутунан үлэлээн-хамсаан төрөөбүт дойдубутун салгыы сайыннарар ытык иэстээхпит.
Эһиэхэ уонна чугас дьоҥҥутугар чэгиэн-чэбдик туругу, этэҥҥэ буолууну, эйэлээх халлааны, уһун дьоллоох олоҕу, бары үтүөнү баҕарабыт.

Мэҥэ Хаҥалас улууһун дьаһалтатын пресс-сулууспата