Тыымпыга зоотехник-селекционердар күрэхтэһиэхтэрэ

От ыйын 11-12 күннэригэр Бүлүү улууһун “1 Тоҕус нэһилиэгин” Тыымпы сэл. “Сырдык Уулаах” сайылыкка бэрт сэргэх тэрээһин буолаары турар.

Ол курдук, зоотехник-селекционердар III өрөспүүбүлүкэтээҕи куонкурустара  ыытыллыаҕа. Куонкуруһу СӨ Тыатын хаһаайыстыбатын уонна аска-үөлгэ бэлиитикэтин министиэристибэтэ “Сахаагроплем” СӨ СБТ иһитиннэриини хааччыйыыга эрэгийиэннээҕи киинин кытта тэрийэллэр. Манна тыа хаһаайыстыбатын тэрилтэлэрин уонна бааһынай-пиэрмэр хаһаайыстыбаларын зоотехническэй сулууспатын исписэлиистэрэ кыттаары бэлэмнэнэллэр. Кинилэр кыттыылара көрүҥнэринэн баалынан сыаналаныаҕа.

“Кэскиллээх селекционер”, “Үлэтин таптыыр”, “Зоотехническай сулууспа бэтэрээнэ”, “Сүөһү, сылгы, таба иитиитигэр племенной сыанабыл”, “Автоматизированнай чахчылар баазаларын кытта үлэ” диэн номинацияларынан дьүүллүүр сүбэ кыайыылаахтары быһаарыаҕа. Куонкурус чэрчитинэн үгүс тэрээһин күүтүллэр.

“Идэтигэр бастыҥ” өрөспүүбүлүкэтээҕи үһүс куонкурус биллэр судаарыстыбаннай-политическай диэйэтэл, сири оҥорууга норуодунай хамыһаара Степан Максимович Аржаков төрөөбүтэ 125 сылыгар анаммыта тэрээһини өссө дириҥ суолталыыр.  Күрэхтэһээччилэр куонкурус кэмигэр билиилэрин-көрүүлэрин киэҥник, дьиҥ үлэҕэ хайдах туһаналларын көрдөрүөхтэрэ.

Ону тэҥэ САССР үтүөлээх зоотехниктара Маппырова М.Г. уонна Цыпандин И.П. төрөөбүттэрэ 100 сылыгар анаммыт Саха Өрөспүүбүлүкэтин племенной сулууспатын бэтэрээннэрэ көрсүһүөхтэрэ. Өссө улуустар дэлэгээссийэлэрэ успуорка эмиэ күрэхтэһиэхтэрэ.  Онон Тыымпыга бэрт сэргэх күннэр ааһыахтара

Хаартыска: архыыптан