Тыыннаах харыйаны кэрдиигэ ирдэбил күүһүрэр

Саҥа дьыллааҕы бырааһынньыктар чугаһаан, харыйаны бэлэмнээһиҥҥэ ирдэбил үрдээн, СӨ Экологияҕа министиэристибэтэ ойуур хаһаайыстыбатын сокуонун ирдэбиллэрин туһунан санатта.

Саҥа дьыллааҕы бырааһынньыктарга харыйаны эбэтэр атын мутукчалаах мастары бэлэмнээһин ыраастаныахтаах тыа учаастактарыгар (квартальнай аартыктар, минерализованнай балаһалар, баһаары утары уонна ойуур хаһаайыстыбатын суолларын трассалара, уоту биэрэр лииньийэлэр уонна атын ирдэммэт атын сирдэр) ыытыллар.

Гражданнар тус наадаларыгар Саҥа дьыллааҕы харыйаны ойуур маһын атыылаһыы-атыылааһын дуогабарынан  бэлэмниэхтэрин сөп. Уурбаанньыттар уонна юридическай сирэйдэр – аукцион түмүгүнэн түһэрсиллибит ойуур маһын атыылаһыы-атыылааһын дуогабарыгар олоҕуран.

Аукциоҥҥа кыттыан баҕалаахтар «Ойуур хаһаайыстыбата» тэрилтэҕэ олорор сирдэринэн эбэтэр харыйаны бэлэмниэн баҕарар сирдэринэн баран сайабылыанньа биэрэллэрэ наада. Ойуур хаһаайыстыбатын исписэлиистэрэ сайабылыанньа суруйарга көмөлөһүөхтэрэ, бэлэмниир сири талан уонна сүбэ-ама биэриэхтэрэ. Ону тэҥэ гражданнар тус наадаларыгар сайабылыанньаны биэрэр саамай табыгастаах уонна түргэн ньыма — «Госуслуги» портал нөҥүө.

Атыылаһыы-атыылааһын дуогабарынан төлөбүр ахсаанынан (устууканан) уонна Рф Бырабыыталыстыбатын 2007 сыл ыам ыйын 22 күнүнээҕи 310 №-дээх уурааҕынан олохтоммут төлөбүр ыстаапкаларыгар олоҕуран оҥоһуллар:

• 1 м диэри – 54,31 солк.;
• 1,1-2 м – 84,49 солк.;
• 2,1-3,0 м – 181,04 солк.;
• 3,1-4 м – 250,45 солк.;
• 4 м үөһэ – 319,84 солк.

Санатар буоллахха, Саҥа дьыллааҕы тыыннаах харыйаны сокуоннайа суох кэрдии иһин административнай эбэтэр холуобунай эппиэтинэс көрүллэр.