Түүҥҥү кулуупка билсиһии содула…

ИДьМ Дьокуускайдааҕы салаатын полиция 3-с нүөмэрдээх отделыгар Дьокуускай куорат олохтооҕуттан сайабылыанньа киирбит. Дьахтар полиция үлэһиттэригэр барга сырыттаҕына кимэ биллибэт киһи суумкатыттан  131 000 солк. уорбутун туһунан кэпсээбит.

Суһал-ирдиир үлэ кэмигэр холуобунай ирдэбил үлэһиттэрэ быһаарбыттарынан, харчыны барга сылдьыбыт  23 саастаах Ньурбаттан төрүттээх эр киһи уорбут эбит.

Быһаарыллыбытынан, дьахтар ол күн уурдарыытын устубут уонна ону-маны атыылаһар былааннаах эбит. Ол сырыттаҕына дьүөгэтэ түүҥҥү кулуупка барыахха диэн кучуйбут. Барга эмсэҕэлээччи  уорбаланааччыны кытары билсибит. Дьахтар суумкатын хаалларан баран кылгас кэмҥэ атын сиргэ барбытыгар, эр киһи харчыны уоран баран куотан хаалбыт.  Эр киһи уоруутун улахан аҥаарын таксыыга, саунаҕа, арыгыга, аска-үөлгэ бараабыт.

Билигин туһааннаах уоруунан РФ Холуобунай кодексын  158 ыст. 2  чааһынан холуобунай дьыала көбүтүлүннэ диэн ИДьМ пресс-сулууспата иһитиннэрдэ.