Түүҥҥү кулуупка билсиһии уоруунан түмүктэммит

ИДьМ Дьокуускайдааҕы 1-кы №-дээх полиция салаатын дьуһуурунай чааһыгар сүтүктээх дьахтартан үҥсүү киирбит. Ол курдук, кини баан каартатын счетуттан 50 тыһ. солкуобай уоруллубут.

Холуобунай ирдэбил үлэһиттэрэ суһал көрдөөһүн түмүгүнэн эрдэ сууттана сылдьыбыт 18 саастаах эр киһини туттулар. Онно биллибитинэн, уорбаланааччы эмсэҕэлээбит дьахтары кытта түүҥҥү кулуупка билсибиттэр уонна киэһэлэрин салгыыр туһуттан атын сиргэ барбыттар. Онно тиийэн эр киһи дьахтар мобильнай баан нөҥүө төлүүрүгэр харчылааҕын көрбүт уонна уорарга санаммыт. Дьахтартан төлөпүөн уларсыбыта буолбут уонна биллибэтинэн харчыны уорбут.  Уорбут харчытын тус наадаларыгар туттубут.

Арассыыйа Федерациятын холуобунай кодексатын 158  ыст. 3 ч. «Уоруу» диэнинэн холуобунай дьыала тэриллибит. Бу туһунан ИДьМ пресс-сулууспата иһитиннэрэр.