Түүҥҥү кулуупка дьахтар эр киһини билсээт, төлөпүөнүн уонна харчытын уордарбыт

Дьокуускай полициятын отделыгар олохтоох дьахтар сайабылыанньа түһэрбит.

Биллибэт эр киһи суотабай төлөпүөнүн, онтон кэлин баан счетуттан 73 тыһыынча солкуобайы уорбут. Бу туһунан ИДьМ пресс-сулууспата иһитиннэрэр.

Холуобунай ирдэбил үлэһиттэрэ уорбаланааччыны туппуттар. Урут сууттана сылдьыбыт 32 саастаах эр киһи буолара биллибит.

Силиэстийэ быһаарыытынан, түүҥҥү аралдьытар тэрилтэҕэ дьахтар уорбаланааччыны кытта билсибит. Саҥа билсибит киһитэ дьахтар көрбөтүнэн туһанан, төлөпүөнүн сиэбигэр уктан, кулууптан кыбынан тахсыбыт. Кэлин мобильнай баан көмөтүнэн 73 тыһыынча солкуобайы уорбут. Хара санаалаах эр киһи харчыны күүлэйдииригэр туһаммыт. Ол кэннэ сим-каартатын ылан бырахпыт уонна уоруллубут смартфону бэйэтэ туһана сылдьыбыт.

Холуобунай дьыала тэрилиннэ. Уорбаланааччы алта сылга диэри көҥүлэ быһыллыан сөп.