Түүҥҥү кулуупка иирсээн холуобунай дьыалаҕа тиэрдибит

ИДьМ сулууспатын 2 №-дээх полициятын отделын дьуһуурунай чааһыгар балыыһаттан Дьокуускай куорат олохтооҕо төбөтүн эчэтэн, балыыһаҕа киллэриллибитин туһунан иһитиннэрии киирбит.

Холуобунай ирдэбил үлэһиттэрэ суһал-көрдүүр дьаһалларынан уорбаланааччыны быһаардылар. Хаҥалас улууһуттан төрүттээх 24 саастаах эдэр киһи буолара биллибит. Силиэстийэҕэ быһаарыллыбытынан, эмсэҕэлээччи Дьокуускай куорат биир түүҥҥү кулуубугар кырбаммыт. Онно кини уонна урут билсибит эдэр киһи икки ардыгар иирсээн тахсыбыт. Эдэр дьон түүҥҥү кулууп таһыгар таһырдьа сыһыаннарын быһаарса тахсыбыттар. Ол кэннэ уорбаланааччы эмсэҕэлээччини төбөҕө хаста да охсубут. РФ  Холуобунай кодексатын 111-с ыстатыйатын 1-кы чааһынан («Соруйан доруобуйаҕа ыар эчэйиини оҥоруу») холуобунай дьыала көбүтүлүннэ. Бу ыстатыйанан буруйдаах 8 сылга диэри көҥүлэ быһыллыан сөп, диэн  ИДьМ пресс-сулууспата иһитиннэрэр.