Учаастактааҕы быыбардыыр хамыыһыйа чилиэннэрэ «ИнформУИК» үөрэнэллэр

Саха сиригэр тохсунньу 15 күнүттэн «ИнформУИК» бырайыагын олоххо киллэрии чэрчитинэн, дьиэлэри кэрийэ сылдьан нэһилиэнньэҕэ иһитиннэрэр үлэни ыытыыга Учаастактааҕы быыбардыыр хамыыһыйа чилиэннэрин үөрэтии саҕаланна.

Билиҥҥитэ үөрэх интэриниэт нөҥүө барар, оттон үөрэҕи бүтэрдэхтэринэ нэһилиэнньэҕэ иһитиннэрэр үлэни ыытааччылар тургутууну ааһыахтара диэн СӨ Киин быыбардыыр хамыыһыйата иһитиннэрэр. Ол кэннэ Учаастактааҕы быыбардыыр хамыыһыйа чилиэннэрэ күнүскү үөрэҕи ааһыахтара.

«ИнформУИК» диэн тугун быһаарар буоллахха – бу быыбардыыр учаастактар сирдэригэр баар кыбартыыралары (дьиэлэри) учаастактааҕы быыбар хамыыһыйатын чилиэннэрэ кэрийэ сылдьан, биирдиилээн иһитиннэрэр үлэни ыытар ньымаларыгар үөрэтии буолар. Онуоха мобильнай сыһыарыы туһаныллыаҕа.

2023 с. өрөспүүбүлүкэтээҕи быыбар кэмигэр Саха сирин 11 улууһугар бу бырайыагы боруобалаан көрөн баран биһирээбиттэрэ. Олунньу 17 күнүттэн кулун тутар 7 күнүгэр диэри өрөспүүбүлүкэ бары куораттарыгар уонна сэлиэнньэлэригэр учаастактааҕы быыбар хамыыһыйаларын чилиэннэрэ Арассыыйа Федерациятын Бэрэсидьиэнин быыбарын туһунан быыбардааччыларга тус бэйэлэригэр иһитиннэриини ыытыахтара.

Өрөспүүбүлүкэҕэ дьиэлэри кэрийэ сылдьан нэһилиэнньэҕэ иһитиннэрэр үлэни ыытыыга 2600-н тахса учаастактааҕы быыбардыыр хамыыһыйа чилиэннэрэ үлэлиэхтэрэ.