Учаастактан сылтаан ыстараап түһүөн сөп диэн сэрэтэллэр

Росреестр дроннары туһанан сир учаастактаах дьону хонтуруоллуур уонна ыстарааптыыр былааннаах диэн «Коммерсант» иһитиннэрэр.

«Учаастак хаһаайыттарыгар сир сокуонун кэспиттэрин (сири көҥүлэ суох былдьааһын, туһаммат буолуу эбэтэр сөбө суохха туһаныы уо.д.а.) туһунан суругунан, ол иһигэр электроннай почтанан биллэриэхтэрэ», — диэн этиллэр.

Салгыы биэдэмистибэ муниципальнай былаас уорганнара түһэрэр ыстарааптарын биирдиилээн дьоҥҥо 200-300 солкуобайтан 10000-20000 солкуобайга диэри үрдэтиини туруорсар. Юридическай сирэйдэргэ бу ыстараап уон төгүл улаатыан сөп.

Административнай быраабы кэһиилэр тустарынан кодекска маннык уларытыылар сири хонтуруоллааһыны чэпчэтиэхтэрэ уонна ыстараап хомуйуутун элбэтиэхтэрэ диэн бэлиэтииллэр.

Бэс ыйыгар Росреестр туһаныллыбатах сир учаастактарын былдьааһын бүтэһик миэрэ буоларын, хаһаайыттарга ханнык баҕарар кэһиини көннөрөллөрүгэр кыах бэриллэрин туһунан эппитэ.