Учуонай Семенов: Саха сиригэр көстүбүт былыргы көмүүлэр наукаҕа интэриэһи үөскэтэллэр

Дьааҥы улууһугар соһуччу көстүбүт хас да көмүү наука эйгэтигэр үөрэтэргэ интэриэһи үөскэтэллэр, онно чинчийэр-көрдүүр үлэлэри ыытыахтарын баҕараллар. Бу туһунан ТАСС-ка Ем. Ярославскай аатынан Хотугу норуоттар устуоруйаларын уонна култуураларын Холбоһуктаах судаарыстыбаннай түмэлин этнография уонна археология секторын салайааччытын эбээһинэһин толорооччу Анатолий Семенов иһитиннэрдэ.

Балаҕан ыйыгар Верхоянскай куораттан чугас сиргэ бульдозерынан сир үлэтин кэмигэр аты кытта көмүллүбүт киһи былыргы көмүүтэ көстүбүтүн туһунан иһитиннэрии тарҕаммыта. Онно учуонайдар тиийбиттэрэ, ол эрээри улууска тымныылар түһэннэр, хаар халыҥ уолан, булумньуну сиһилии үөрэтэр кыаллыбатах.

«Бу сир археологическай чинчийиигэ олус кэскиллээх, ол эрээри биллэр биричиинэлэринэн сири барытын көрөр кыахпыт суох. Хас да көмүү көһүннэ. Киһи уонна ат бииргэ көмүллүбүттэрин туһунан иһитиннэрии бигэргэммэтэ. Атын сиэр-туом ыытыллыбыт буолуон сөп диэн сабаҕаланар. Баар дааннайдарынан, XIX үйэҕэ өлбүт киһини тиһэх суолугар атаарарга, хоруоп хаппаҕар кыыл тобохторун уураллара үһү», — диэтэ Семенов. Кини бэлиэтээбитинэн, ол сиргэ хас да көмүү биирдэ көстүбүт.

«Бу эбийиэк археологическай сыаннастаах. Бу сиргэ чинчийэр-көрдүүр үлэлэри ыытыахха наада», — диэн Семенов эбэн эттэ. Саха Өрөспүүбүлүкэтин култуура баайын-дуолун харыстыыр Управлениетын салайааччыта Николай Макаров иһитиннэрбитинэн, Дьааҥы улууһун дьаһалтатын уонна үлэни толорооччуну кытта сөбүлэһэн, бу сири кэтээн көрөргө былаанныыллар.