Салгыы
Учуонай Василий Винокуров дьоһуннаах кинигэтин биһирэмэ буолла

Учуонай Василий Винокуров дьоһуннаах кинигэтин биһирэмэ буолла

09.12.2022, 21:11
Бөлөххө киир:

СӨ Бырабыыталыстыбатын улахан саалатыгар СӨ  тыатын хаһаайыстыбатын  үтүөлээх үлэһитэ, экэнэмиичэскэй наука кандидата, өрөспүүбүлүкэ 12-с ыҥырыылаах Үрдүкү Сэбиэтин дьокутаата (1990-1993 сс.), СӨ Бочуоттаах бэтэрээнэ, Өймөкөөн улууһун Бочуоттаах гражданина Василий Винокуров-Хотугу Саха «Дьылҕам миэнэ — олоҕум оҥкула (сэрии сылын оҕотун дьылҕата)» кинигэтин сүрэхтэниитэ буолан ааста. 

Кинигэ ааптара Василий Винокуров олоҕун бүтүннүү өрөспүүбүлүкэ хотугу улуустарын тыатын хаһаайыстыбата сайдыытыгар анаабыт буолан, бу кинигэтигэр баай уопутун, үлэлээбит кэмнэрин үтүө аргыстарын  — доҕотторун,  олох сайдыытыгар, үүнэр көлүөнэни сайыннарыыга сонун көрүүлэрин анааран ырыппыт.

Кэрэхсэбиллээҕэ баар, Василий  Степанович кинигэтин аттыгар олорор киһини кытта олллооннон олорон кэпсэтэр курдук бэрт истиҥник, олохтоохтук санаа атастаһардыы суруйбут.

Ол курдук,  тыа хаһаайыстыбатын салаатыгар өр сылларга тахсыылаахтык үлэлээбит салайааччы олоҕун уустук түгэннэрин, ситиһиилэрин холбуу тутан суруйбута, биллэн турар, ааҕааччы болҕомтотун тардар. Василий Степанович хоту улуустарга үлэлии сылдьыбыт кэмнэрин ахтыы эрэ курдук буолбакка, наукаҕа олоҕуран туох дьоһуннаах көрүүлэри оҥорбутун дьоҥҥо толору тиэрдэр.

Өймөкөөн улууһун баһылыга Иннокентий Сивцев «Саха АССР төрүттэммитэ 100 сылыгар анаан Өймөкөөн улууһугар былааннаммыттара, ол чэрчитинэн бу кинигэ таҕыста. Киэҥ далааһыннаах үлэ Василий Винокуров суруйуута кини эрэ олоҕун туһунан кинигэ буолбатах. Бу — биһиги дойдубут уонна Саха сирин устуоруйата.  Өрөспүүбүлүкэ тыатын хаһаайыстыбата сайдыытыгар тус олоҕун анаабыт салайааччы чулуу, үлэһит олоҕо кэлэр көлүөнэ билсиитигэр, төрөөбүт дойдутун дьонун туһунан билиэн, үөрэтиэн баҕалаахтарга ананар», — диэн бэйэтин эҕэрдэ тылыгар бэлиэтээтэ.

Анаабыр, Өймөкөөн, Дьааҥы, Эбээн Бытантай улуустарын Бочуоттаах олохтооҕо Василий Винокуров кинигэтин биһирэмэр  бу улуустар баһылыктара кини үлэлээбит кэмигэр  тыа хаһаайыстыбатын салаатыгар, НПО тыа хаһаайыстыбатын институтун дириэктэрин солбуйааччынан үлэлии сылдьан бу оройуоннар социальнай-экэнэмиичэскэй сайдыыларыгар улахан кылаатын киллэрбитин бэлиэтээтилэр. Василий Степанович салайааччы, учуонай быһыытынан саха ынаҕын, сылгытын сайыннарыыга, чинчийиигэ үгүс сыратын киллэрбит сатабыллаах  салайааччынан буоларын үгүс эҕэрдэ тыл эппит дьон бэлиэтээтилэр. Ил Түмэн дьокутааттара Елена Голомарева уонна Сахамин Афанасьев командировкаҕа сылдьар буолан, кыайан кэлбэтилэр, онон куйаар ситиминэн бэйэлэрин эҕэрдэлэрин тиэртилэр.

«Дьылҕам миэнэ — олоҕум оҥкула (сэрии сылын оҕотун дьылҕата)» кинигэни   Василий Винокуров-Хотугу Саха  тапталлаах  олоҕун аргыһа, педагогическай наука кандидата, СӨ үөрэҕириитин үтүөлээх үлэһитэ, Өймөкөөн уонна Эбээн Бытантай  улуустарын Бочуоттаах гражданина, РФ суруналыыстарын чилиэнэ Маргарита Винокурова эрэдээксийэлээн таһаарда.

Дьоро тэрээһин биир үөрүүлээх түгэнинэн  дьиэ кэргэн аатыттан Маргарита Винокурова Өймөкөөн улууһун Олоҥхо ыһыаҕын бэлэмнээһин пуондатыгар анаан 100 тыһыынча солкуобай сэртипикээтин тэрийэр кэмитиэккэ үөрүүлээх быһыыга-майгыга  туттарда.

Василий Степанович уонна Маргарита Егоровна Винокуровтар бырабыыталыстыба дьиэтин суолталаах саалатыгар  барыга бары көхтөөх, сомоҕолоһуулаах биир дойдулаахтара — Өймөкөөн дьоно-сэргэтэ кинигэ биһирэмигэр кэлэн, үтүө санааларын тиэрдибиттэригэр, дьиэ кэргэн үөрүүтүн үллэстибиттэригэр истиҥник махтаннылар.

Бары сонуннар
Салгыы
9 февраля
  • -46°C
  • Ощущается: -46°Влажность: 65% Скорость ветра: 1 м/с

Сообщить об опечатке

Текст, который будет отправлен нашим редакторам: