Учуонайдар аан бастакытын саха сүөһүтүн эмбрионнарын ыллылар

Академик Л.К. Эрнст аатынан Сүөһү иитиитин федеральнай чинчийэр киинин – ВИЖ учуонайдара дойду быраактыкатыгар аан бастаан ураты хотугу боруода ынах – саха сүөһүтүн эмбрионнарын ылан, криобааҥҥа  уһун кэмнээх харайыыга уурдулар. Бу туһунан ТАСС-ка институт пресс-сулууспата иһитиннэрдэ.

«Бу ситиһии  тыа хаһаайыстыбатын бигэ сайдыытын хааччыйыыга стратегическай суолталаах.

Бүгүн ахсаана олус аҕыйах саха сүөһүтэ Арктика ыарахан усулуобуйатыгар тыыннаах хааларын, ыарыыларга ураты тулуйумтуо буолууну уонна бородууксуйатын ураты иҥэмтэлээх хаачыстыбатын хааччыйар сыаната биллибэт күндү геннэрин илдьэ сылдьар. Бу боруода сүтүүтэ дойду биологическай эгэлгэтигэр толуйуллубат сүтүк буолуо этэ», — диэн иһитиннэриигэ этиллэр.

Үлэ «Якутский скот» уонна «Сахаагроплем» тэрилтэлэрин кытта, РФ бэрэсидьиэнин 2024 сыл кулун тутар 19 күнүнээҕи ыйааҕынан Л.К. Эрнст аатынан ВИЖ баазатыгар тэриллибит Тыа хаһаайыстыбатын кыылларын генетическэй ресурсаларын национальнай киинин сайыннарыы бырагырааматын чэрчитинэн ыытылынна.

Экспериментальнай эмбриология лабораториятыгар үлэ толору эргиирэ толорулунна: донордары гормонунан бэлэмнээһинтэн саҕалаан, ынахтар клеткаларын тыыннаахтыы ылыы, организм таһыгар лаборатория усулуобуйатыгар ууһатыы уонна үүннэрии, олорор кыахтаах эмбрионнары ылыы, онтон салгыы тоҥоруу уонна криобааҥҥа уһун кэмҥэ харайа угуу.

«Номнуо сүүсчэкэ саха сүөһүтүн эмбриона криохранилищеҕа харалла сытар. Маннык технология боруода айылҕаҕа олорор сирдэригэр эпидемия, килиимэт эбэтэр атын кутталлартан тутулуга суох уһун кэмҥэ харалла сытарын мэктиэлиир. Бу научнай ситиһии дойду боруодаларын харыстыырга эрэ буолбакка, популяциялары түргэнник чөлүгэр түһэрэргэ уонна бүтүн дойду сүөһүтүн иитиитин бөҕөргөтөргө сыаналаах кыыл генотиптарын элбэтэргэ кыах биэрэр», — диэн институкка бэлиэтээтилэр.