Учуонайдар бүгүн күүстээх магнитнай буурҕа түһэрин сэрэтэллэр

Күн астрономиятын лабораторията Арассыыйа уонна Европа олохтоохторугар долгутуулаах сабаҕалааһыны таһаарда. Бүгүн, сэтинньи 7 күнүгэр, күүстээх магнитнай буурҕа буолуо диэн сабаҕаланар.

Учуонайдар этэллэринэн, геомагнитнай күүрүү таһыма күн-дьыл уларыйыытыгар ылынымтыа дьон уонна олох-дьаһах эйгэтин эппиэтинэстээх үлэһиттэрэ болҕомтолорун уурар гына үрдүөҕэ.

Лаборатория дааннайдарынан, сэтинньи 7 күнүгэр дьиҥнээх улахан геомагнитнай күүрүү күүтүллэр. Толору кээмэйдээх магнитнай буурҕа саҕаланарын сабаҕалааһына 61% тэҥнэһэр. Онуоха кыра геомагнитнай долгуйуулар 25% буолуохтарын сөп, оттон магнитосфера  дьайыыта кыра туруктаах буолуон 14% эрэ сабаҕалыыллар.

Геомагнитнай күүрүүнү кээмэйдиир Кр-шкаланан буурҕа 7,33 индекскэ тиийиэҕэ – бу G3.3 категорияҕа сөп түбэһэр. Маннык таһым «күүстээх геомагнитнай күүрүү» диэн сыаналанар уонна Сиргэ баар араас тиһиктэргэ, тыынар-тыыннаахха барытыгар араас содулу аҕалыан сөп.

Күн-дьыл уларыйыытыгар билимтиэ, геомагнитнай күүрүү кэмигэр төбө ыарыытыттан, хаан баттааһынын хамсааһыныттан, утуйбат буолууттан уонна да атын сибикилэртэн эрэйдэнэр дьоҥҥо, учуонайдар хас да сэрэтэр сүбэни тутуһарга ыҥыраллар. Чуолаан, бу күннэргэ доруобуйаларын ордук көрүнэллэрэ, элбэх ууну иһэллэрэ уонна улаханнык үлэлээбэттэрэ наада.