Учуонайдар өртөөһүн туһалааҕын дакаастаатылар

Ил Түмэҥҥэ ыытыллыбыт төгүрүк остуол кыттыылаахтара өрөспүүбүлүкэ бырабыыталыстыбатыгар Российскай Федерация сиригэр-уотугар үлэлиир Баһаары утары эрэсиим быраабылаларын 185-с пуунугар уларытыылары киллэрэр туһунан этии ыытарга сүбэлээтилэр.

Сүрүн төрүөтүнэн эрэгийиэн тыйыс усулуобуйатыгар өртөөһүн үүнүүгэ уонна аһылык от хаачыстыбатыгар туһалаах дьайыылааҕын көрдөрбүт научнай чинчийиилэр түмүктэрэ буолла.

Ил Түмэн пресс-сулууспата иһитиннэрэринэн, Саха сирин тыатын хаһаайыстыбатын уонна ас-үөл бэлиитикэтин министиэристибэтэ хонтуруоллаах сааскы өртөөһүннэри уонна сэрэтэр өртөөһүннэр араас көрүҥнээх сирдэргэ от үүнүүтүн биллэ үрдэтэллэрин, от саппааһын хаачыстыбатын уонна  састаабын тупсаралларын туоһулуур дааннайдары билиһиннэрдэ.

Чинчийиилэр көрдөрбүттэринэн, үүнээйи ситэр кэмигэр өртөөһүн үүнүүнү элбэтэр, иҥэмтэлээх эттиктэрин үрдэтэр уонна протеин иҥэмтиэтин тупсарар. Бу зоотехническэй нуормаларга эппиэттиир уонна аһылык сыаннаһын улаатыннарар. Учуонайдар маннык түмүккэ кэллилэр — Саха сиригэр өртөөһүн  от үүнүүтүн  таһымын үрдэтиигэ наадалаах.