Учуонайдар силинэн истириэһи сыаналыыр тест оҥордулар

Сибиирдээҕи федеральнай университет, РАН Сибиирдээҕи салаатын Красноярскайдааҕы научнай киинин (КНЦ СО РАН) Биофизика институтун уонна Неврология научнай киинин (Москва к.) учуонайдара  үрдүк эппиэтинэстээх үлэһиттэр истириэстэрин сыаналыыр  теһи оҥорбуттарын туһунан РФ Үөрэҕин уонна билим министиэристибэтиттэн «Газета.Ru» кэпсээтилэр.

Анаалыһы ырытар ньыма үрдүк эппиэтинэстээх үлэһиттэр бэйэлэрин туруктарын кэтээн көрүүнү быдан судургутутар, истириэс үрдүк таһымын түргэнник быһаарарга кыах биэрэр уонна үлэһиттэр доруобуйаларын тус дааннайдарын оҥорорго көмөлөһөр. Саҥа ньыма биолюминесцентнай ферменнээх тестынан оҥоһуллар. Ол көмөтүнэн хас да мүнүүтэ иһинэн киһи силин ырытан, организмын уопсай туругун уонна истириэһин таһымын билиэххэ сөп.

Учуонайдар бэлиэтээбиттэринэн, билигин Красноярскайга оҥоһуллубут ньымаҕа аналог суох, ол эрээри Оҥоһуу өйү туһанан ырытар ньымалары мэдиссиинэ көмөтүн быһыытынан туһана сатааһын киэҥник тарҕаммыт. Саҥа оҥоһуллубут ньыма атын идэлээх үлэһиттэр туруктарын  хонтуруоллуурга эмиэ туттуллуон сөп. Бу ордук симиэнэҕэ тахсар үлэһиттэргэ «үлэ-сынньалаҥ» сөптөөх кэмнэрин быһаарарга уонна истириэһи сэрэтэргэ наадалаах.