Учуот прибордара сыл ахсын 2,5 млрд солк. субсидияҕа диэри кэмчилиир кыахтаахтар

Тиэхиньиичэскэй өттүнэн холбоноллоро табыгастаах элбэх кыбартыыралаах дьиэлэргэ счетчиктары туруоруу сыл аайы хомунаалынай өҥө субсидиятыгар 2,5 млрд солкуобайга диэри кэмчилиэн сөп.

Бу сыыппараны Ил Дархан Айсен Николаев бэрэссэдээтэллээх Счетнай балаата эспиэрдиир-ырытар тэрээһинин түмүгүнэн ыытыллыбыт мунньахха иһитиннэрдилэр.

Ырытыы көрдөрөрүнэн, 2022–2024 сылларга уонна 2025 сыл бастакы биэс ыйыгар  тарыыптар араастаһыыларын сабыыга төлөнөр субсидия уопсай суумата 104 млрд солк. тиийбит. 2022 сылга бу суума 28 млрд солк этэ, онтон 2024 сылга 40 млрд диэри улааппыт. Ороскуот саамай улахан өлүүскэтэ ититии эниэргийэтигэр барар — 71-тэн 77%-ҥа диэри.

Нэһилиэнньэ төлөһөр таһыма үрдүк, 95,5 бырыһыан. Бу субсидия кээмэйин үрдээһинэ биирдиилээн дьон төлөөбөттөрүттэн буолбакка, салааҕа куруук баар кыһалҕаттан тахсарын бигэргэтэр. Чуолаан, элбэх кыбартыыралаах дьиэлэр учуоттуур прибордарынан 50%-ра эрэ хааччыллан тураллар.

Онон Ил Дархан билиҥҥиттэн бу кыһалҕаны быһаарбатахха, бүддьүөт уонна ОДьКХ тэрилтэлэрин ноҕоруускалара үрдүү туруор диэтэ.

Мунньах кыттыылаахтара приборунан учуоттааһыны түргэнник сайыннарыыны, дьиэ итиитин тутан турарын үрдэтиини, коммунальнай өҥө ороскуотун оптимизациялааһыны, инвестиционнай бырагырааманы олоххо киллэриини күүскэ хонтуруоллааһыны уонна субсидияны биэриини хаттаан көрөр наадалааҕын бэлиэтээтилэр.

Тэрээһиҥҥэ хапытаалынай өрөмүөн кэмигэр учуоттуур прибордары хайаан да туруораллара, чэпчэтиилээх тарыыбынан туһанааччылартан дьоҕус уонна орто урбаан тэрилтэлэрин таһаарыы, ОДьКХ тэрилтэлэрин салайааччыларыгар сүрүн көрдөрүүлэри киллэрии этии быһыытынан киирдилэр, диэн иһитиннэрэр Ил Дархан, бырабыыталыстыба пресс-сулууспата.