Учуутал, дириэктэр Мария Атласова 90 сааһынан үөрэнээччилэрэ эҕэрдэлээтилэр

Уус Маайа улууһун Күп орто оскуолатын 1972 сыллаахха бүтэрбит выпускниктар бүгүн учууталларыгар видеонан эҕэрдэ таҥан ыыттылар. Кинилэр химияҕа учууталлара, дириэктэрдэрэ Мария Викторовна Атласова бүгүн 90 сааһыгар үктэннэ.

Кырдьаҕас учуутал, дириэктэр билигин да үөрэппит оҕолорун кытта билсэ олорор. Билигин кини үөрэнээччилэрэ өрөспүүбүлүкэ араас улуустарынан, куораттарынан  олороллор.

Москваҕа олорор үөрэнээччитэ, СӨ үп министиэристибэтин бэтэрээнэ Анна Романовна Винокурова көҕүлээһининэн ааспыт сылга орто оскуоланы бүтэрбиттэрэ 50 сылынан ахтыы хомуйан кинигэ таһаарбыттара. Манна учууталларын Мария Викторовна туһунан олус истиҥник ахтыбыттара. Бастатан туран, учууталлара олоҕу таптыырга, туохха барытыгар ытыктабыллаахтык сыһыаннаһарга үөрэппитин, кинини холобур оҥостоллорун бэлиэтээбиттэрэ.

Күндү учууталлара Мария Викторовна бүгүн эҕэрдэтин тутан, үөрэнээччилэригэр махталын ыытар. Үөрэппит оҕолорунан киэн туттарын этэр.

Марта Николаева.