Учуутал хоһооннорун хомуурунньуга сүрэхтэннэ

Балаҕан ыйын 16 күнүгэр Саха Өрөспүүбүлүкэтин үөрэҕириитин туйгуна, Мэҥэ Хаҥалас улууһун «Таммахтар» литературнай холбоһук ааптара Айталина Афанасьевна Кошунова «Айар алып аартыгар» саҥа кинигэтэ В.Г.Белинскэй аатынан бибилэтиэкэҕэ сүрэхтэннэ.

Кинигэҕэ алын кылаас учуутала идэлээх, өр сылларга айар үлэни аргыс оҥостубут Айталина Кошунова кыра кылаас үөрэнээччилэригэр аналлаах араас тэрээһиннэргэ суруллубут, киһи олоххо аналын, дьылҕа уустук эргиирдэрин ырыҥалыыр хоһоонноро сүүмэрдэнэн киллэриллибиттэр.

Айталина Кошунова Майаҕа төрөөбүтэ. 1983 сыллаахха Дьокуускайдааҕы 1-кы нүөмэрдээх педагогическай училищены, 1990 сыллаахха Саха судаарыстыбаннай университет педагогикаҕа факультетын бүтэриэҕиттэн Мэҥэ Хаҥалас, Дьокуускай оскуолаларыгар үлэлээн, билигин бочуоттаах сынньалаҥҥа олорор.
Айталинаҕа ийэтэ, Мэҥэ Хаҥалас Томторуттан төрүттээх, ССРС култууратын туйгуна, үлэ, тыыл бэтэрээнэ, 40-ча сыл устата оҕо бибилэтиэкэтигэр үлэлээн ааспыт Галина Федотовна Ошустанова сабыдыала улахан. Ол курдук, кини киһини өйдүүр буолуоҕуттан кинигэ аргыстаах улааппытын туһунан итиитик-истиҥник ахтар.

Айар үлэнэн 1996 сылтан дьарыктанар. Бэйэтэ кэпсииринэн, оскуола араас тэрээһиннэригэр сахалыы тыллаах хоһооннору хасыһа олорор бокуойа суоҕуттан айан саҕалаабыт. Ол курдук, алын кылаас оҕотугар:

«Үөрэххэ-билиигэ тардыһан
Сайдыылаах дьон буолан тахсыахпыт,
Айылҕа кэрэтин харыстаан
Төрөөбүт дойдуну таптыахпыт.
х х х
«Азбукабыт» барахсан!
Эйиэхэ махтанабыт —
Истиҥ доҕор буолбуккар,
Үөрэх суолун аспыккар.
х х х
Таптаан хоһоон аахтыгыт
Таабырыммын таайдыгыт,
Аны араас кинигэни
Ааҕа сылдьыҥ, эһиги».

«Таммахтар» литературнай холбоһугу 18 сыл (1981-1999 сс) салайбыт суруйааччы Иван Афанасьевич Сысолятин Айталина «Төрөөбүт төрүт тылбынан» хоһоонун улуус хаһыатыгар (06.03.89) таһаарбыта. Итинтэн утуу-субуу Айталина Кошунова хоһоонноро араас хаһыаттарга, «Таммахтар» кинигэлэригэр, эдэр ааптардар хомуурунньуктарыгар бэчээттэнэр буолбуттара. Учуутал түбүктээх үлэтин быыһыгар «Таммахтар» холбоһук бары тэрээһиннэригэр биир актыыбынай ааптарбыт, көмөлөһөөччүбүт быһыытынан сыаналанар.

Айталина Афанасьевна кинигэтин сүрэхтэниитигэр кини хоһоонноро ааҕылыннылар. Оскуолаҕа, педагогика факультетыгар бииргэ үөрэммит доҕотторо, үлэлээн ааспыт үөлээннээхтэрэ, аймахтара истиҥ иһирэх ахтыылары оҥордулар. Инникитин өссө үрдүк айымньылаах үлэни баҕардылар.

Августина ХАБАРОВА