Хаартыска: ааптар тиксэриитэ
Ааспыт үөрэх дьылыгар биһиги холбоһукпутугар Намнааҕы кэллиэһи бүтэрбит Кристина Игнатьевна Старостина диэн эдэркээн учуутал үлэлии кэлбитэ. Төрдүс кылаастары үөрэппитэ.
Илииттэн илиигэ сылдьан, ыһыллан хаалбыт кэлэктииби бэрт кылгас кэм иһигэр сомоҕолообута. Ирдэбиллээх буолан, үгүһү ситиспитэ. Ол курдук саас ВПР-га үгүс оҕо хаачыстыбаҕа үлэлээбитэ, куһаҕан сыананы ылбыт оҕо суоҕа. Бу саҥа үлэлиир учууталга ситиһии буолар. Үөрэҕи таһынан, араас хайысхаҕа былааннаан, иитэр үлэтин тэрийбитэ. «Ытык сирдэр» бырайыакка кыттан, Калистрат Елисеевич Владимиров аатынан КСК тиэргэнин иһэ-таһа ыраас, хомуллуулаах буоларын ситиспиттэрэ. Чулуу тустуук олоҕун, спортивнай ситиһиилэрин, үлэтин-хамнаһын чинчийбиттэрэ.
«Оскуола тыйаатыра» түмсүү тэрийэн ыытар Амма Аччыгыйа «Сааскы кэм» арамаанынан инсценировканы көрүүгэ биир бастыҥынан ааттанан, улуустааҕы «Эдэр актер» күрэскэ кыттарга мэктиэлэммиттэрэ. «Эдэр актер» күрэскэ иккис миэстэни ылан, үөрэн-көтөн кэлбиттэрэ. Салгыы «Кустук» өрөспүүбүлүкэтээҕи драматическай көрүүгэ ситиһиилээхтик кыттан, «Кэскиллээх кэлэктиип» анал аакка тиксибиттэрэ.
Кылаас оҕото бары «Хоһоонноохтук ааҕыы» дьарыгар сылдьар. Араас күрэхтэһиилэргэ кыттан, куруук миэстэлэһэллэр. Онтон саамай улахана «Язык предков» тэрийиитинэн «Кыайыы күнүнэн» күрэскэ кыайыылаах аатын сүгэн, 1 миэстэни ылбыттара буолар. Бу Арассыыйа араас эрэгийиэннэриттэн кыттыылаах күрэс этэ.
Кристина Игнатьевна төрөппүттэри кытары биир сомоҕо буолан үлэлиир. Ол түмүгэ кылаас алын сүһүөҕү бүтэрэринэн отчуоттуур кэнсиэрэ үрдүк таһымҥа туруоруллубута буолар.
Быйыл Кристина Игнатьевна маҥнайгы кылаастары ылан, ааҕарга-суруйарга, суоттуурга үөрэтэн саҕалаата. Кырачааннар учууталларын наһаа сөбүлээтилэр, уоскулаҥҥа аттыттан арахпаттар.
Удьуор утума салҕанар холобурун Кристина Игнатьевнаҕа көрөбүн. Ийэтинэн эбэтэ Альбина Лукинична Посельская дьохсоҕоннор биир киэн туттар учууталлара этэ. Аҕатынан эдьиийдэрэ Голиковалар Хара Алданнар тумус туттар учууталлара буолаллар.
Эдэркээн учуутал Кристина Игнатьевнаны кэлэн иһэр идэлээх күммүтүнэн эҕэрдэлиибин. Саҕалаабытыҥ курдук салҕана турдун! Кырачааннары сайыннарар, үөрэтэр үлэҥ ситиһиилээх буоллун. Кэскилиҥ өссө да иннигэр! Оҕо аймах тапталын-махталын ылан, учуутал бастыҥа, уһуйааччы үтүөлээҕэ буола үүн-сайын!
Валентина КРИВОШАПКИНА,
СӨ үтүөлээх учуутала,
Таатта, Харбалаах
Арассыыйа анал сулууспалара дьон тус дааннайдарын хомуйар уонна булан биэрэр саамай бөдөҥ телеграм-боту — «Глаз…
Саха Өрөспүүбүлүкэтин Төрүт сокуонугар киллэриллибит уларытыылар өрөспүүбүлүкэҕэ үөрэхтээһини бөҕөргөтөр эрэ буолбакка, барыга хаачыстыбалаах үөрэх тиийимтиэ…
СӨ Ил Дархана Айсен Николаев бүгүн, алтынньы 23 күнүгэр, хас да каадыр ыйааҕар илии баттаата. …
«Аҕа дойдуну көмүскээччилэр» пуонда Мэҥэ Хаҥаластааҕы салаатыгар байыаннай дьайыыга дьоруойдуу олоҕун толук уурбут Александр Данилов…
Алтынньы 23 күнүгэр Ил Түмэн сэттис ыҥырыылаах уон төрдүс (уочараттаах) пленарнай мунньаҕын кэмигэр норуот дьокутааттара…
Саха сирин тирэх пуунун үлэһиттэрэ байыаннай дьайыы зонатыгар Саха сириттэн сылдьар байыаннай сулууспалаахтарга баһыылкалары тиэрдиини…