Учуутал күнүгэр Бэс Күөлгэ саҥа оскуола аанын аста

Бүгүн, алтынньы 5 күнүгэр, Горнай улууһун Атамай нэһилиэгэр аныгылыы тутуулаах саҥа оскуоланы үөрүүлээх быһыыга-майгыга астылар.

Олохтоохтору Ил Дархан Айсен Николаев тиийэн эҕэрдэлээтэ. Кини учууталлары уонна оҕолору эҕэрдэлээн туран, саҥа оптуобус күлүүһүн туттарда. 150 миэстэлээх оскуола Арассыыйа Бэрэсидьиэнэ Владимир Путин сорудаҕынан тутулунна.

Бэрэсидьиэн быһаарыытынан оскуоланы тутууга Уһук Илин биир кэлим субсидиятын тыырбыттара. Эбии үбүлээһин өрөспүүбүлүкэ бүддьүөтүттэн көрүллүбүтэ. Онон уопсай үбүлээһин кэриҥэ 567 мөл. солк. тахса буолбута.

«Оскуола Арассыыйа Бэрэсидьиэнэ Владимир Путин сорудаҕынан тутулунна. Тутууну РФ Бырабыыталыстыбатын Бэрэссэдээтэлин солбуйааччы-Бэрэсидьиэн Уһук Илин боломуочуйалаах бэрэстэбиитэлэ Юрий Трутнев ураты хонтуруолугар ылбыта. Олох кылгас кэм иһигэр аныгы ирдэбилгэ эппиэттиир, саҥа тутуу дьэндэйдэ», – диэн бэлиэтээтэ Айсен Николаев.

Тутуу уопсай иэнэ 3 тыһ. кв. тахса. Манна успуорт уонна аактабай саалалар, бибилэтиэкэ, остолобуой, мэдиссиинэ кэбиниэтэ, мастарыскыай, лаборатория, дьаһалта хосторо бааллар. Оскуола миэбэлинэн, үөрэтэр лаборатория оборудованиетынан, компьютерынан, интерактивнай дуоскаларынан хааччылынна. Оскуола тиэргэнигэр успуорт былаһаакката уонна футболлуур хонуу оҥоһуллубут.

«Бэс Күөл оскуолата Саха сирин биэс бастыҥ агрооскуолатын иһигэр киирэр уонна үчүгэй үгэстэрдээх. Саҥа оскуола Атамай нэһилиэгин уонна өрөспүүбүлүкэ салгыы сайдыытыгар тирэҕинэн буолуо диэн эрэнэбин», — диэтэ ИлтДархан.

Санатан эттэххэ, 2021 с. Бэс Күөлүн биир кыбаартала айылҕа баһаарыттан улаханнык эмсэҕэлээбитэ. Кылгас кэм иһигэр дьиэлэри тутан чөллөрүгэр түһэрбиттэрэ. Ол сыл мунньахха Ил Дархан Айсен Николаев Владимир Путинтан Атамай нэһилиэгэр социальнай эбийиэктэри тутууга көмө көрдөөбүтэ.

Эбийиэктэр баһаар кэмигэр эмсэҕэлээбэтэхтэрэ, ол эрээри эргэрэннэр саҥардыы ирдэнэрэ. 2022 с. дойду баһылыгын сорудаҕынан саҥа оскуоланы уонна Элбэх өҥөнү оҥорор киини тутуу саҕаламмыта. Эрдэ Бэс Күөлүн оскуолата 1980 с. тутуллубут мас дьиэҕэ баара. Бүгүҥҥү күҥҥэ оскуолаҕа 120-н тахса оҕо үөрэнэр, 26 учуутал үлэлиир. Атамай оскуолата агро-хайысхалаах, бэйэтэ оҕуруоттаах, ол иһигэр «өйдөөх тэпилииссэлээх». Научнай-чинчийэр уонна оҥорон таһаарар киин үлэлиир. Оскуола оҕолоро бэйэлэрэ эрдэ ситэр дьиэ көтөрүттэн уонна үнээйиттэн бородууксуйаны оҥорон таһаараллар.

2023 с. оскуола «Оскуола биисинэс-инкубатора» статуһун ылбыта. Инкубаторы сайыннарарга «Оҕолор нэһилиэккэ – Нэһилиэк оҕолорго» бырайыак үлэлиир. Бу бырайыак Тимченко пуондатын бүтүн дойдутааҕы «Среда возможностей» куонкуруһугар кыайбыта.